एमालेले केपी ओली नेतृत्वको सरकारलाई भन्यो, ‘चर्चामा आएका सबै भ्रष्टाचार प्रकरणमाथि छानबिन गर’

काठमाडौँ । नेकपा एमालेले चर्चामा आएका सबै भ्रष्टाचार प्रकरणमाथि छानबिन गर्न सरकारलाई ध्यानाकर्षण गराएको छ । आफैँ सत्तारुढ दल रहेको नेकपा एमालेले केन्द्रीय कमिटी बैठकमार्फत सरकारलाई सबै चर्चामा आएका भ्रष्टाचार प्रकरणको छानबिन गरि निष्कर्शमा पुग्न ध्यानाकर्षण गराएको हो । 

Watch On

गत आइतबारदेखि सुरु भएर आज सम्पन्न भएको केन्द्रीय कमिटीले पारित गरेको विशेष प्रस्तावमा भ्रष्टाचारको अनुसन्धान, अभियोजन र न्याय निरूपणका लागि स्थापित राज्यका निकायहरूलाई अझ अधिकारसम्पन्न बनाउन र चर्चामा रहेका सबै प्रकरणहरूको यथाशीघ्र छानबिन गरी निष्कर्षमा पुऱ्याउन सरकारको ध्यानाकर्षण गराएको हो । 

‘गम्भीर सामाजिक चुनौतीका रूपमा रहेको भ्रष्टाचारलाई नियन्त्रण गर्न सरकारले सुरू गरेका कदमहरू सकारात्मक छन् । यो बैठक भ्रष्टाचारको अनुसन्धान, अभियोजन र न्याय निरूपणका लागि स्थापित राज्यका निकायहरूलाई अझ अधिकारसम्पन्न र साधनस्रोतले युक्त बनाउन, भ्रष्टाचारका विरूद्ध सामाजिक जागरण वृद्धि गर्न, सहकारी अनियमिततामा बचतकर्ताहरूको रकम सुरक्षितसाथ फिर्ता हुने कुरा सुनिश्चित गर्न, मुछिएका जोसुकैका विरुद्ध निर्ममतापूर्वक प्रस्तुत हुन र भ्रष्टाचार भएको भनी चर्चामा रहेका सबै प्रकरणहरूको यथाशीघ्र छानबिन गरी निष्कर्षमा पुऱ्याउन सरकारको ध्यानाकर्षण गर्दछ। र, आफ्नो पङ्क्तिमा सदाचार, स्वच्छता र पारदर्शिता सुनिश्चित गर्ने गराउने दृढ संकल्प गर्दछ।’, प्रस्तावमा भनिएको छ । 

त्यस्तै नेकपा एमालेको केन्द्रीय कमिटी बैठकले १४ वटा समसामयिक प्रस्ताव पारित गरेको छ । तीन दिन चलेको केन्द्रीय कमिटी बैठकले १४ वटा प्रस्ताव पारित गर्दै बैठक समापन गरेको हो ।