रवि लामिछानेको थुनछेक बहस आज, रविका विरुद्ध ११ जना सरकारी वकिलले बहस गर्ने

काठमाडौँ । राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेको जिल्ला अदालत काठमाडौँमा आज थुनछेक बहस हुँदै छ । काठमाडौँको स्वर्णलक्ष्मी सहकारी ठगी मुद्दाको बयानका लागि आइतबार बिहानै अदालत पुगेका लामिछानेको बयान सकिएपनि थुनछेक बहस सुरु भएको थिएन । 

Watch On

सरकारी वकिलहरुले बयान अध्यनका लागि समय माग गरेपछि आइतबार न्यायाधीश माधवप्रसाद अधिकारीले लामिछानेलाई न्यायिक हिरासतमा पठाउन आदेश गरेका थिए । 

आज सुरु हुने बहसमा रविविरुद्ध  सरकारी वकिलका तर्फबाट काठमाडौँ जिल्ला सरकारी वकिल कार्यालयका प्रमुख रामहरि शर्मा काफ्ले, जिल्ला न्यायाधिवक्ता खडिन्द्रराज कटुवाल सहित ११ जना सरकारी वकिलले बहस गर्ने जनाईएको छ । 

यस्तै लामिछानेका तर्फबाट भने वरिष्ठ अधिवक्ता तथा  पूर्वन्यायाधिवक्ताद्वय सुशिल पन्त, रमन श्रेष्ठ तथा अधिवक्ता नारायण डा नारायणदत्त कडेल, राजेन्द्र सेढाँई लगाएतले बहस गर्ने छन् । स्वर्णलक्ष्मी सहकारी संस्थाको बचत अपचलन प्रकरणमा पुस २१ गते लामिछानेसहित ३९ जनालाई प्रतिवादी बनाएर काठमाडौँ जिल्ला अदालतमा मुद्दा दर्ता भएको थियो । लामिछानेविरुद्ध ५ करोड ८ लाख बिगो दाबी गर्दै सहकारी ठगी र संगठित अपराधमा मुद्दा दर्ता गरिएको छ । स्वर्णलक्ष्मी ठगी प्रकरणका दुई अभियुक्त भने यसअघि नै धरौटीमा छुटिसकेका छन्।