रवि लामिछानेविरुद्ध जिल्ला अदालत काठमाडौँमा आज पनि थुनछेक बहस, आदेश आउन सक्ने

काठमाडौँ । राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेविरुद्ध जिल्ला अदालत काठमाडौँमा तेस्रो दिनको थुनछेक बहस आज सुरु हुँदै छ । काठमाडौँको स्वर्णलक्ष्मी सहकारी ठगी मुद्दाको बयानका लागि आइतबार बिहानै अदालत पुगेका लामिछानेको बयान सकिएपनि थुनछेक बहस सुरु भएको थिएन । सोही थुनछेक बहसका लागि सोमबार बिहानै अदालत पुर्याइएका उनीविरुद्ध ११ जना सरकारी वकिलले बहस  गरेका थिए । साथै जाहेरकर्ताका तर्फबाट २ जनालो बहस गरेका थिए । 

Watch On

आज पनि केहि जाहेरवालाका तर्फका अधिवक्ताहरुल बहस गर्ने छन् भने त्यसपछि रवि लामिछानेका तर्फबाट बहस हुने छ । आजै जवाफ बहस समेत सकिएको अवस्थामा थुनछेक आदेश आउने सम्भावना रहेको एक अधिवक्ताले बताए । 

यस्तै लामिछानेका तर्फबाट भने वरिष्ठ अधिवक्ता तथा  पूर्वन्यायाधिवक्ताद्वय सुशिल पन्त, रमन श्रेष्ठ तथा वरिष्ठ अधिवक्ता नारायण घिमिरे, अधिवक्ता डा नारायणदत्त कँडेल, राजेन्द्र सेढाँई लगायतले बहस गर्ने छन् । 

स्वर्णलक्ष्मी सहकारी संस्थाको बचत अपचलन प्रकरणमा पुस २१ गते लामिछानेसहित ३९ जनालाई प्रतिवादी बनाएर काठमाडौँ जिल्ला अदालतमा मुद्दा दर्ता भएको थियो । लामिछानेविरुद्ध ५ करोड ८ लाख बिगो दाबी गर्दै सहकारी ठगी र संगठित अपराधमा मुद्दा दर्ता गरिएको छ । स्वर्णलक्ष्मी ठगी प्रकरणका दुई अभियुक्त भने यसअघि नै धरौटीमा छुटिसकेका छन्।