काठमाडौँ। वरिष्ठ अधिवक्ता दिनेश त्रिपाठीमाथि दुर्व्यवहार भएको छ । जिल्ला अदालत काठमाडौँबाट बाहिरिँदै गर्दा बाहिर सडकमा उनीमाथि दुर्व्यवहार भएको हो । 

उनले आज काठमाडौँ जिल्ला अदालतमा जारी रवि लामिछानेको थुनछेक बहसमा रविको विपक्षमा बहस गरेका थिए । अदालत बाहिर रहेको मानिसहरको समूहले त्रिपाठी विरुद्ध नाराबाजी गर्दै उनलाई धक्का दिएर लखेटेका थिए । उनलाई अन्य मानिसहरूले भीडबाट बचाएका थिए । घटनास्थलमा रहेको सिधाकुराकर्मी लक्ष्मण गिरीअनुसार अदालत परिसरबाट बाहिरिएर सञ्चार माध्यममा प्रक्रिया दिँदै गर्दा उनीमाथि धक्का मुक्का भएको हो । 

त्यसपछि त्रिपाठी भागेर अर्को बाटो हुँदै पुनः अदालत परिसरमा प्रवेश गरेका थिए । अदालत परिसरमा भेला भएका मानिसहर को हुन भन्ने खुलेको छैन् । 

कतिपयले उनीहरु रास्वपा समर्थक रहेको आरोप लगाएका छन् । तर, रास्वपाले रवि विरुद्धको मुद्दाको सुनुवाइ क्रममा  अदालत परिसरमा नेता कार्यकर्तालाई नबोलाइएको र  उनीहरूको को हुन भन्ने थाहा नभएको बताएको छ । ‘पार्टी र स्वयम् सभापतिज्यूले न्यायिक प्रक्रियालाई सघाई रहेको अवस्था छ,’  एक नेताले सिधाकुरासँग भने, ‘कसैसँग कुनै खालको वैमनस्यता पार्टी र सभापति ज्यूको छैन् । कसैको व्यक्तिगत रिसइबी भए हामीले जान्ने कुरा होइन । ’

जो कसैबाट भए पनि अधिवक्ता त्रिपाठीमाथि भएको दुर्व्यवहार गलत भएको भन्दै रास्वपाले उक्त घटनाप्रति दुःख व्यक्त गरेको छ ।