काठमाडौँ । नेपाली कांग्रेसले हालको सत्ता समिकरणमा कुनै समस्या नरहेको निष्कर्ष निकालेको छ । नेपाली कांग्रेसका सभापति शेरबहादुर देउवाले कांग्रेसबाट प्रतिनिधित्व गरेर सरकारमा सहभागी भएका मन्त्रीहरूको कार्य प्रगति विवरणबारे जानकारी लिनका लागि आह्वान गरिएको बैठकले सो निष्कर्ष निकालेको हो । 

बैठकबाट बाहिरिने क्रममा कांग्रेसबाट गृहमन्त्री बनेका रमेश लेखकले नेपाली कांग्रेस र नेकपा एमालेबिच कुनै विवाद नरहेको र यहि सरकार गतिशिल ढंगले अघि बढ्ने निष्कर्ष निकालेको बताए । ‘यो नेपाली कांग्रेसको संघीय संसदीय दलको कार्यसमितिको बैठक थियो’, गृहमन्त्री लेखकले भने, ‘आजको बैठकमा सबैजना मन्त्रीहरु उपस्थित भएर आआफ्ना कार्यविवरणमाथि छलफल भएको छ । आजको छलफलले हामी दुई दल मिलेर सरकार बनेको छ, हाम्रा बिचमा कुनै समस्या छैन, सरकारमा काम गर्न कुनै बाधा व्यवधानहरु छैनन । अब आआफ्ना मन्त्रालयहरुमा थप राम्रा काम कसरी गर्ने भन्ने विषयमा छलफल भएको छ ।’

त्यस्तै आजको बैठकमा नेकपा एमाले र नेपाली कांग्रेसबिच भएको ७ बुँदे सहमति अनुसार समिकरणलाई अगाडि लिएर जाने विषयमा छलफल भएको उनले बताए । ‘पहिलो कुरा, नेकपा एमाले र नेपाली कांग्रेसबिच भएको ७ बुँदे सहमति अनुसार यो समिकरणलाई अगाडि लिएर जाने कुरामै केन्द्रीत भएर हामी काम गर्ने हो भन्ने विषयमा छलफल भयो।’, गृहमन्त्री लेखकले भने, ‘दोस्रो कुरा, सेवा प्रवाहको क्षेत्रमा नागरिकलाई बढी भन्दा बढी सेवा प्रवाह गर्ने र मुलुकमा आर्थिक समृद्धि गर्ने, शुसासन कायम गर्ने कुरामा केन्द्रीत भएर काम गर्ने विषयमै छलफल भयो ।’