सबै कुरा

प्रहरीलाई कुच्चिएको रित्तो गाग्री बुझाएर सिंहदरबार छिरे हर्क साम्पाङ

सिधाकुरा

मंगलबार, माघ ८, २०८१

प्रहरीलाई कुच्चिएको रित्तो गाग्री बुझाएर सिंहदरबार छिरे हर्क साम्पाङ

काठमाडाैँ । धरान उपमहानगरपालिकाका मेयर हर्क साम्पाङ सिंहदरबार प्रवेश गरेका छन् । उनले आफूले ल्याएको कुच्चिएको रित्तो गाग्री प्रहरीलाई बुझाएर खालीहात सिंहदरबार प्रवेश गरेका हुन् ।

Watch On

धरानलाई सरकारले खानेपानीको समस्या समाधान गर्न सहयोग नगरेको भन्दै रित्तो गाग्री लिएर सिंहदरबार प्रवेश गर्ने तयारीमा रहेका साम्पाङलाई प्रहरीले रोकेको थियो । सिंहदरबार निशेधित क्षेत्र रहेको र सो क्षेत्रमा कुनै पनि विरोधका गतिविधि गर्न नपाउने भन्दै प्रहरीले साम्पाङलाई सिंहदरबार परिसरबाटै रोकेको थियो ।

त्यस्तै प्रहरीले आफूहरुले सो गाग्री लिने र साम्पाङलाई पछि जिम्मा लगाउने बताएपछि साम्पाङले सो गाग्री प्रहरीलाई बुझाएर सिंहदरबार प्रवेश गरेका हुन् ।

उनी सिंहदरबारमा खानेपानी मन्त्रीलाई भेटेर समस्या राख्न खानेपानी मन्त्रालय छिरेका छन् । उनले आजै प्रधानमन्त्रीलाई समेत भेटेर आफ्नो कुरा राख्ने बताएका छन् ।

मेयर साम्पाङले धराने जनताले काकाकुलको जीवन बिताइरहँदा सरकार मुकदर्शक भएको भन्दै विरोध गर्दै आएका छन् । उनले सरकारले आफूहरुलाई खानेपानीका लागि पर्याप्त बजेट नदिएको भन्दै सरकारको विरोध गर्न आइतबार रित्तो, कुच्चिएको गाग्री लिएर काठमाडौँ आएका थिए ।

प्रकाशित मिति: मंगलबार, माघ ८, २०८१

प्रतिक्रिया दिनुहोस्