सांसदहरूको रक्सी काण्डः होटलको फुटेज र बिल झिकाउन रास्वपा सांसद कठायतको माग

काठमाडौँ । राष्ट्रिय स्वतन्त्र पार्टीकी सांसद विनिता कठायतले कृषि समितिका सदस्य बसेको पोखराको होटलको सीसीटीभी फुटेज झिकाउन समितिमा निवेदन दिएकी छिन् । गत पुस २९ गते कृषि समितिका सदस्यहरू बसेको पोखराको होटल ओपन हाउसको सीसीटीभी फुटेज झिकाउन सांसद कठायतले कृषि, सहकारी तथा प्राकृतिक स्रोत समितिमा उजुरी दिएकी हुन् । 

समितिमा सूचना अधिकारीलाई दिइएको निवेदनमा सांसद कठायतले सो गतेको साँझ ८ बजे देखि १० बजेसम्मको सीसीटीभी फुटेज र बिल भरपाई झिकाउन माग गरेकी छिन् । ‘उपरोक्त सम्बन्धमा कृषि समितिले मिति २०८१/०९/२४ देखि २०८१/०९/२९ सम्म नेपालगञ्ज देखि पोखरा सम्मको ६ दिने अनुगमन कार्यक्रम अन्तर्गतको भ्रमणको सन्दर्भमा मिति २०८१/०९/२९ मा समिति सदस्य बसेको होटल ओपन हाउस पोखराको राति ८ बजे देखि १० बजे सम्मको सीसीटीभी फुटेज झिकाई उपलब्ध गराउन, साथै उक्त दिनमा भएको खर्च विवरणको बिल भरपाई पनि उपलब्ध गराउन अनुरोध गर्दछु।’, सांसद कठायतले दिएको निवेदनमा उल्लेख छ । 

प्रतिनिधिसभा अन्तर्गतको सो समितिका सदस्यहरुले अनुगमनका क्रममा पुस २९ गते सो होटलमा बसेको र त्यस साँझ समितिका सभापतिसहितले मदिरा सेवन गरेर अरुको चरित्रहत्या गरेको विषय सांसद कठायतले उठाएकी थिइन् । उनले समितिको बैठकमै सो विषय आपत्तिजनक रहेको र कसैको व्यक्तिगत जीवनमा पसेर कसैले टिप्पणी गर्न नपाउने भन्दै आक्रोश पोखेकी थिइन् । 

सरकारी खर्चको भ्रमणमा सांसदहरूको ककटेल साँझः रक्सी लागेपछि बाझाबाझ

सो विषय उठाइरहँदा समितिका सभापतिले सांसद कठायतलाई प्रमाण लिएर आउन भनेपछि उनले समितिमा निवेदन दिएर सो विवरण झिकाउन माग गरेकी हुन् ।