काठमाडौँ । गृहमन्त्री रमेश लेखकले पाथीभरा केबलकार निर्माण विवादबारे छलफल गर्न ताप्लेजुङका तीन सांसदलाई मन्त्रालयमा बोलाएका छन् । पाथीभरा क्षेत्रमा पछिल्लो केही दिनयता केबलकार निर्माणको विषयलाई लिएर प्रदर्शन गरिरहेका स्थानीय र प्रहरीबिच भएको विवादलाई लिएर गृहमन्त्री लेखकले ताप्लेजुङका सांसदलाई छलफलमा बोलाएका हुन् । 

गृहमन्त्री लेखकले आफूहरुलाई मंगलबार साँझ ५ बजेका लागि छलफलमा बोलाएको ताप्लेजुङकी प्रतिनिधि सभा सदस्य उर्मिला थेबेले जानकारी दिइन् । ‘अवस्था दिनप्रतिदिन उग्र बन्दै गएपछि गृहमन्त्रीज्यूले हामीलाई छलफलका लागि बोलाउनुभएको छ ।’, सांसद थेबेले भनिन्, ‘जे नहुनुपर्ने थियो, त्यो भइरहेको छ । वार्ता र संवादबाट अघि बढ्नुपथ्र्यो तर त्यो भएको छैन । यस विषयमा बेलुका छलफल गर्नेछौँ ।’

गृहमन्त्री लेखकले ताप्लेजुङबाट प्रतिनिधिसभामा प्रतिनिधित्व गरिरहेका तीनै जना सांसद योगेश भट्टराई, उर्मिला थेबे र लीलादेवी बोखिमलाई छलफलमा बोलाएका हुन् । 

योगेश भट्टराई र उर्मिला थेबे नेकपा एमालेबाट प्रतिनिधिसभामा प्रतिनिधित्व गर्छन भने लीलादेवी नेपली कांग्रेसबाट सांसद बनेकी हुन् । 

पाथीभरा क्षेत्रमा शनिबार प्रहरी र केवलकार निर्माणको विरोध गरिरहेका आन्दोलनकारीबीच झडप हुँदा चार जना घाइते भएका छन् । काफ्लेपाटीभन्दा माथि रहेको बलुडाँडामा झडप हुँदा स्थानीय र सुरुक्षाकर्मी दुवै पक्ष घाइते भएका छन् ।