न्यायाधीशलाई ‘झोले न्यायाधीश’ भन्ने प्रभु शाहविरुद्ध अवहेलना मुद्दा दर्ता

काठमाडौँ । न्यायाधीशलाई ‘झोले न्यायाधीश’ भन्ने प्रभु शाहविरुद्ध अवहेलना मुद्दा दर्ता भएको छ । आम जनता पार्टीका अध्यक्ष एवम् प्रतिनिधिसभा सदस्य समेत रहेका साहविरुद्ध रौतहट जिल्ला अदालतमा अवहेलना मुद्दा दर्ता भएको हो।

Watch On

सांसद शाहले केही समयअघि सामाजिक सञ्जाल फेसबुकमा लेखेको एक स्टाटसका आधारमा उनीविरुद्ध मुद्दा दायर भएको हो । उनीविरुद्ध उनकै पार्टीबाट बौधिमाई नगरपालिकाका मेयरमा निर्वाचित भएका प्रदिपकुमार यादवले मुद्दा दायर गरेका हुन् । मेयर यादवले अध्यक्ष शाह र महासचिव त्रिभुवन साह उपर शुक्रबार मुद्दा दर्ता गरेका हुन् ।

सांसद शाहले गत पुस २९ गते आफ्नो फेसबुक अकाउन्टमा नेताहरूको झोले न्यायधीशले रौतहट बदनाम एवं अस्तव्यस्त बनायो भन्दै टिप्पणी गरेका थिए । उनले  लेखेका थिए, ‘नेताहरूको झोले न्यायधीशले रौतहट बदनाम एवं अस्तव्यस्त भयो । बेईमान एवं अयोग्य न्यायधीशहरूलाई छानबिनको दायरामा ल्याऊन म सम्मानीय प्रधानन्यायधीश ज्युको बिशेष ध्यानाकर्षण गराउछु ।’

पछिल्लो समय सांसद शाह र मेयर यादवबिच विवाद भइरहेको छ । साहविरुद्ध अदालत परिसरमा ज्यान मार्ने धम्की दिएको आरोप समेत छ । 

मेयर यादवमाथि आक्रमण गरेको आरोपमा सांसद साहका कार्यकर्ता रहेका गंगाराम बैठालाई अदालतले पुर्पक्षका लागि थुना पठाउने आदेश भएको थियो । अदातलको सो आदेशपश्चात सांसद साहले सो अभिव्यक्ति दिएको बुझिएको छ ।