काठमाडौँ । मुकुम्लुङ संरक्षण अन्तरदलीय संघर्ष समितिले आह्वान गरेको बन्दको ९० प्रतिशतसम्म असर परेको छ । पाथिभरामा केबलकार निर्माणको विरोधमा पहिचान पक्षधरले आह्वान गरेको बन्द अरुणपूर्वका पहाडी जिल्लामा ९० प्रतिशतसम्म प्रभाव परेको हो ।

कोशी प्रदेश प्रहरी कार्यालयका अनुसार प्रदेशका पहाडी जिल्लामा बन्दको असर धेरै र अन्य क्षेत्रमा कम परेको छ । कोशी प्रदेश प्रहरी कार्यालयका कार्यवहाक सूचना अधिकारी डिएसपी ध्रुव कुमार श्रेष्ठका अनुसार इलाम, पाँचथर, ताप्लेजुङ, तेह्रथुम र धनकुटा गरि ५ जिल्लामा ९० प्रतिशतसम्म बन्दको प्रभाव परेको छ भने झापामा बन्दको ४० प्रतिशत प्रभाव छ  । 

त्यस्तै सुनसरीमा २५, सङ्खुवासभामा २० र मोरङमा १० प्रतिशत बन्दको असर परेको डिएसपी श्रेष्ठले सिधाकुरालाई बताए । 

त्यस्तै झापामा एक यात्रुवहाक बसमाथि तोडफोड भएको प्रहरीले जनाएको छ । तोडफोडपश्चात स्थिति नियन्त्रणमा लिन प्रहरीले केही राउण्ड अश्रुग्याँस प्रहार गरेको छ । 

त्यस्तै यातायातका साधन बन्द गराउने र तोडफोडमा उत्रिने १० जनालाई पक्राउ गरेको छ । प्रकाउ पर्नेमा धरानका ६ जना र झापाका ४ जना रहेका छन् ।

प्रदर्शनकारीले केबलकार निर्माणको निर्णय खारेज हुनुपर्ने, आन्दोलनका क्रममा पक्राउ परेका नेता कार्यकर्ता रिहाई गर्नुपर्ने, मुकुम्लुङमा गोली चलेको घटनाको न्यायीक छानविन गर्नुपर्ने, काफ्ले पार्टीबाट सुरक्षा फौज फिर्ता गर्नुपर्नेलगायत माग राख्दै ९ जिल्लामा बन्दको आह्वान गरेका छन् ।