पाथिभरामा नो केबलबार अभियानः झापामा पक्राउ पर्नेको सङ्ख्या ८ पुग्यो, यातायात ठप्प

झापा । मुकुम्लुङ संरक्षण अन्तरदलीय संघर्ष समितिले आह्वान गरेको बन्द लागु गर्न सडकमा पुगेका झापाका ८ जना पक्राउ परेका छन् । ‘पाथिभरामा नो केबलबार अभियान’ अन्तर्गत विरोधमा उत्रिएका उनीहरुलाई प्रहरीले नियन्त्रणमा लिएको हो । 

Watch On

पाथिभरामा केबलकार निर्माणको विरोधमा पहिचान पक्षधरले कोशी प्रदेशका ९ जिल्लामा बन्दको आह्वान गरेका छन् । सोही बन्द लागु गराउन भन्दै सडकमा पुगेका ८ जनालाई नियन्त्रणमा लिइएको कोशी प्रदेश प्रहरी कार्यालयका कार्यवहाक सूचना अधिकारी डिएसपी ध्रुवकुमार श्रेष्ठले सिधाकुरालाई बताए । उनीहरु सार्वजनिक यातायातमा तोडफोड लगायतको कार्यमा संलग्न भएको भन्दै प्रहरीले नियन्त्रणमा लिएको हो । 

त्यस्तै बिहानैदेखि बन्दको प्रभाव रहेको झापाको दमकमा यातायातका साधनहरु ठप्पप्राय रहेको डिएसपी श्रेष्ठले बताए । 

मुकुम्लुङ संरक्षण अन्तरदलीय संरक्षण समितिले पाथिभरा केबलकार निर्माणको विरोधमा विभिन्न आन्दोलनका कार्यक्रमहरु गर्दै आएको छ । समितिले आज र भोलि अरुणपूर्वका ९ जिल्लामा बन्दको आह्वान गरेको थियो । उक्त बन्दले पहाडी जिल्लामा ९० प्रतिशतसम्म प्रभाव परेको प्रहरीको भनाई छ । 

प्रदर्शनकारीले केबलकार निर्माणको निर्णय खारेज हुनुपर्ने, आन्दोलनका क्रममा पक्राउ परेका नेता कार्यकर्ता रिहाई गर्नुपर्ने, मुकुम्लुङमा गोली चलेको घटनाको न्यायीक छानविन गर्नुपर्ने, काफ्ले पार्टीबाट सुरक्षा फौज फिर्ता गर्नुपर्नेलगायत माग राख्दै ९ जिल्लामा बन्दको आह्वान गरेका छन् ।