अवहेलना मुद्दामा प्रभु शाहलाई ७ दिनभित्र जवाफ पेश गर्न अदालतको आदेश

काठमाडौँ । सांसद प्रभु शाहलाई अदालतको अवहेलना मुद्दामा ७ दिनभित्र जवाफ पेश गर्न अदालतले आदेश दिएको छ । आम जनता पार्टीका अध्यक्ष एवम् प्रतिनिधिसभा सदस्य समेत रहेका प्रभु शाहविरुद्ध रौतहट जिल्ला अदालतका न्यायाधीश सम्भुप्रसाद रेग्मीको इजलासले ७ दिनभित्र जवाफ पेश गर्न आदेश दिएको हो । 

Watch On

न्यायाधीशलाई ‘झोले न्यायाधीश’ भनेको विषयलाई प्रभु शाहविरुद्ध अवहेलना मुद्दा दर्ता भएको छ । सांसद शाहले केही समयअघि सामाजिक सञ्जाल फेसबुकमा लेखेको एक स्टाटसका आधार बनाएर उनीविरुद्ध आफ्नै पार्टीका मेयरले मुद्दा दर्ता गरेका हुन् । शाह र पार्टी महासचिव त्रिभुवन साहविरुद्ध शुक्रबार दर्ता भएको मुद्दामा अदालतले सो आदेश दिएको हो ।  उनीहरु दुवैजनालाई ‘अदालतको अवहेलना मुद्दामा किन कारबाही गर्नु नपर्ने हो ? खुलाएर ७ दिनभित्र जवाफ पठाउनु’ भन्ने आदेश भएको अदालतका श्रेस्तेदार उद्धव ढोडारीले बताए । 

सांसद शाहले गत पुस २९ गते आफ्नो फेसबुक अकाउन्टमा नेताहरूको झोले न्यायधीशले रौतहट बदनाम एवं अस्तव्यस्त बनायो भन्दै टिप्पणी गरेका थिए । उनले  लेखेका थिए, ‘नेताहरूको झोले न्यायधीशले रौतहट बदनाम एवं अस्तव्यस्त भयो । बेईमान एवं अयोग्य न्यायधीशहरूलाई छानबिनको दायरामा ल्याऊन म सम्मानीय प्रधानन्यायधीश ज्युको बिशेष ध्यानाकर्षण गराउछु ।’

पछिल्लो समय सांसद शाह र मेयर यादवबिच विवाद भइरहेको छ । साहविरुद्ध अदालत परिसरमा ज्यान मार्ने धम्की दिएको आरोप समेत छ । 

मेयर यादवमाथि आक्रमण गरेको आरोपमा सांसद साहका कार्यकर्ता रहेका गंगाराम बैठालाई अदालतले पुर्पक्षका लागि थुना पठाउने आदेश भएको थियो । अदातलको सो आदेशपश्चात सांसद साहले सो अभिव्यक्ति दिएको बुझिएको छ ।