प्रधानमन्त्री ओली पावरमा पुगेपछि संविधान च्यात्न खोज्छन्ः प्रचण्ड

झापा । नेकपा (माओवादी केन्द्र)का अध्यक्ष पुष्पकमल दाहाल प्रचण्डले अहिलेका प्रधानमन्त्री केपी ओली पावरमा पुगेपछि संविधान च्यात्न तत्पर भएको आरोप लगाएका छन् । शनिबार झापाको दमकमा आयोजित खवरदारीसभालाई सम्बोधन गर्दै उनले ओलीलाई संविधानले नागरिकलाई दिएको अधिकार मन नपरेको दावी गरे । उनले अहिले एकथरि शक्तिहरु संविधान कमजोर बनाउनतिर लागिरहेको पनि बताए । 

Watch On

‘अहिलेका प्रधानमन्त्री केपी ओली जी संविधान बनाउने बेला संघीयता नै ठिक छैन, यो समानुपातिक समावेशी भनेर महिलालाई, दलितलाई, आदिवासी जनजातीलाई अधिकार दिएको पनि मलाई मनपर्या छैन । तर के गर्नु माओवादीले आँधिहुरी ल्यायो, मान्नैपर्यो, सबैले माने भन्ने मान्छे केपी ओली जी हो ।’ उनले भने, ‘त्यसकारण उहाँ जतिबेला पावरमा पुग्नुहुन्छ, उहाँ यो संविधान च्यात्न खोज्नुहुन्छ ।’

त्यस्तै उनले सदन र सडकबाट भ्रष्टाचारविरुद्धको अभियान निरन्तर अघि बढ्ने बताएका छन् । 

शनिबार झापाको दमकमा आयोजित खवरदारीसभालाई सम्बोधन गर्दै प्रचण्डले आफूले तेस्रोपटक प्रधानमन्त्रीको जिम्मेवारी लिएपछि भ्रष्टाचारविरुद्ध युद्ध लड्ने नयाँ सङ्कल्प लिएको र सरकारबाट बाहिरिएपछि सुशासनको एजेण्डालाई लिएर देशब्यापी अभियान थालेको समेत बताए । 

आफूले जनयुद्धमार्फत संघीय लोकतान्त्रिक गणतन्त्र स्थापना गर्ने अभियानको नेतृत्व गर्ने अवसर पाएको उल्लेख गर्दै अध्यक्ष प्रचण्डले अब भ्रष्टाचारविरुद्धको अभियानलाई तीब्र बनाउँदै समाजवादी क्रान्तिका लागि निरन्तर अघि बढ्ने प्रतिबद्धता व्यक्त गरे । उनले अहिलेको प्रधानमन्त्री केपी ओलीलाई संघीयता, समावेश, समानुपातीक प्रणाली मन नगरेको भन्दै ओलीले संविधान च्यात्न खोजेको आरोप लगाए । 

अध्यक्ष प्रचण्डले आफ् पटक पटक प्रधानमन्त्री हुँदा देशभित्र र देशबाहिर नयाँ रेकर्डहरु बन्न थालेपछि दलाल, भ्रष्ट र बिचौलियाहरुले सरकार ढालेको स्पष्ट गरे । अब सरकारबाट बाहिरिएपछि देशब्यापी जनताको बीचमा गएर सुशासनको अभियानको नेतृत्व गर्ने अवसर पाएको र यसले जनतामा माओवादीप्रति नयाँ आकर्षण सुरु भएको उनले दावी गरे ।