रास्वपा धादिङ काठमाडौँ सम्पर्क समितिको सभापतिमा अजय श्रेष्ठ चयन

काठमाडौँ । राष्ट्रिय स्वतन्त्र पार्टी (रास्वपा) को धादिङ काठमाडौँ सम्पर्क विभागको सभापतिमा अजय श्रेष्ठ चयन भएका छन । धादिङ जिल्लामा स्थायी घर भएका र धादिङ जन्मथलो रहेर काठमाडौँमा रहने रास्वपाका समर्थक तथा शुभेच्छुकहरुको भेलाले शनिबार श्रेष्ठको सभापतित्वमा १७ सदस्यीय सम्पर्क विभाग गठन गरेको हो ।

Watch On

विभागको उपसभापतिमा विष्णु सिलवाल, सचिवमा उज्वल श्रेष्ठ चयन भएका छन । साथै धादिङका सबै स्थानीय तहबाट प्रतिनिधित्व हुने गरि सदस्यहरू विभागमा समेटिएको रास्वपा धादिङका सचिव मिनबहादुर अधिकारीले जानकारी दिए ।

राष्ट्रिय स्वतन्त्र पार्टीका कार्यवाहक सभापति डिपी अर्यालको प्रमुख आतिथ्यमा भएको कार्यक्रममा सह महामन्त्री तथा प्रतिनिधिसभा सदस्य सुमना श्रेष्ठ, केन्द्रीय सदस्य उपेन्द्र पाण्डे, केन्द्रीय तथा प्रादेशिक विभागका पदाधिकारी, बागमती प्रदेश समितिका पदाधिकारी, धादिङ जिल्लाका पदाधिकारी लगायतको सहभागिता थियो ।

कार्यक्रममा कार्यवाहक सभापति अर्यालले विभागका पदाधिकारीहरूलाई शुभकामना दिँदै जनताको साथमा रहेर पार्टीको हितमा काम गर्न निर्देशन दिएका थिए । सम्पर्क विभाग तथा जिल्लागत रुपमा उदाहरणीय काम गरेर देखाउन समेत अर्यालको सुझाव थियो ।

कार्यक्रममा धादिङका विभिन्न स्थानीयतहबाट रास्वपाको सदस्यता लिएका नयाँ सदस्यहरूलाई ब्याच लगाइदिएर अर्यालले  पार्टीमा स्वागत गरे। धादिङ जिल्ला सभापति सूर्यमणि पाठकको सभापतित्वमा सम्पन्न कार्यक्रममा विभागमा चयन भएका पदाधिकारीहरूलाई केन्द्रीय सदस्य उपेन्द्र पाण्डेले पद तथा गोपनीयताको शपथ खुवाएका थिए ।