सबै कुरा

सिमेन्टको मूल्य बढाएको भन्दै सांसदहरुले मागे उद्योग मन्त्रीको संसदमा जवाफ

सिधाकुरा

सोमबार, फागुन ५, २०८१

सिमेन्टको मूल्य बढाएको भन्दै सांसदहरुले मागे उद्योग मन्त्रीको संसदमा जवाफ

काठमाडौँ । प्रतिनिधिसभा बैठकमा सांसदहरुले सिमेन्टको मूल्य बृद्धिबारे सरकारको धारणा माग गरेका छन् । आजको बैठकको शून्य समयमा बोल्दै सांसदहरुले सिमेन्टको मूल्य गत साउनयता ७५ प्रतिशतसम्म वृद्धि गरिएको भन्दै उद्योग मन्त्रीसँग संसदमा जवाफ माग गरे ।

सांसद योगेन्द्र मण्डलले साउनमा सिमेन्टको मूल्य ४८४ रहेको मूल्य ७४५ रुपैयाँ पु¥याइएको बताए । सिमेन्टको मूल्य वृद्धिबाट निर्माण व्यवसायीलाई २२ अर्ब, र सर्वसाधारणलाई ४ अर्ब रुपैयाँ नोक्सानी भएको उनले बताए ।

सांसद मण्डलले सिमेन्टको मूल्य बढाउन गत पुष १८ गते उद्योग मन्त्रालयमा छलफल भएको समेत बताए । मन्त्रालयमै भएको छलफलमा सिमेन्टको मूल्य प्रतिबोरा १२० रुपैयाँ वृद्धि बिक्री वितरण गर्नेगरी निर्णय भएको पनि उनले बताए ।

अर्का सांसद राजेन्द्र कुमार केसीले स्वदेशी कच्चा पदार्थबाट उत्पादन हुने सिमेन्टमा अत्यधिक मूल्य वृद्धि गरिएको बताए । काठमाडौँमा ६ सय रुपैयाँमा पाइने सिमेन्टको मूल्य बढाएर साढे ८ सय देखि ९ सय रुपैयाँ पु¥याइएको सांसद केसीले बताए । कच्चा पदार्थमा मूल्यवृद्धि नभएको अवस्थामा तयारी वस्तुको मूल्य वृद्धि गरिएको भन्दै उनले सिमेन्टको मूल्य वृद्धिबारे सरकारको ध्यानाकर्षण गराए ।

‘तीन वर्ष देखि ६ सय रुपैयाँमा पाइराखिएको सिमेन्टको मूल्य साढे ८ सय देखि ९ सय रुपैयासम्म पु¥याइएको छ,’ सांसद केसीले प्रश्न गरे, ‘किन बढ्यो मूल्य कच्चा पदार्थ, बिजुली वा कोइला केमा बढ्यो मूल्य ?’ सिमेन्टको मूल्यका कारण उपभोक्ताहरू मारमा परेको सांसद केसीले बताए । उनले यो विषयमा उद्योग मन्त्रीले जवाफ दिनु पर्ने बताए ।