पूर्वराजाको स्वागतमा अविश्वसनीय जनलहर

काठमाडौँ । पूर्वराजा ज्ञानेन्द्र शाह काठमाडौँ फर्किएका छन् । झण्डै एक महिना लामो गण्डकी प्रदेश बसाइ पछि पूर्वराजा शाह आइतबार अपरान्ह काठमाडौँ फर्किएका हुन् । 

एक निजी विमान चार्टर्ड गरेर पोखराबाट काठमाडौँ आएका शाह ४ बजेर २५ मिनेट जाँदा काठमाडौँ ओर्लिएका थिए । राजसंस्था पुर्नस्थापनाको माग गर्दै आएका राष्ट्रिय प्रजातन्त्र पार्टी र राप्रपा नेपालको पूर्व घोषित अभिनन्दन कार्यक्रम बमोजिम शाहलाई भव्य मानव साङ्लोमार्फत स्कटिङ गरेर महाराजगञ्जस्थित निर्मल निवास पु¥याइएको थियो । 

राजाको स्वागतका लागि भन्दै आइतबार बिहानै देखि उनका समर्थकहरू विमानस्थल बाहिर भेला भएका थिए । राजाको अप्रत्यशित सक्रियाता र राजतन्त्र फर्काउने सुसुप्त अभियान अघि बढेसँगै सरकारले आजको कार्यक्रमलाई विशेष सुरक्षा सर्तकता प्रदान गरेको थियो । 

सरकारले राजावादीका नाममा अवाञ्छित गतिविधि हुनसक्ने आशङ्का गर्दै आजका लागि उच्च सुरक्षा सर्तकता अपनाएको थियो । 

सुरक्षा स्रोतकाअनुसार सरकारले प्रारम्भिक रुपमा अनुमान गरे भन्दा धेरै सङ्ख्यामा पूर्वराजाका समर्थकहरू काठमाडौँमा आज भेला भए । राप्रपाका सांसद ज्ञानेन्द्र शाहीले राजाको स्वागतमा ५० हजार मानिस सडकमा उतार्ने दाबी गरेका थिए । 

तर, सुरक्षा संयन्त्रले अपरान्ह ४ बजेसम्मको उपस्थितिबारे गरेको प्रारम्भिक अनुमानमाअनुसार झण्डै २२ हजार मानिस पूर्वराजाको स्वागतमा सिनामंगल देखि गौशाला सडकमा उपस्थित थिए । यस्तै, शाहको निजी निवास निर्मल निवास अघि पनि सयौँका सङ्ख्यामा रहेका समर्थकहरू पूर्व राजालाई कुरेर बसेका थिए । 

‘झण्डै २५ हजार हाराहारीमा मानिसहरु पूर्व राजालाई स्वागतका लागि आएको अनुमान गर्न सकिन्छ,’ फिल्डमा खटिएका एक सुरक्षा अधिकारीले भने, ‘यो सरकारले प्रारम्भिक अनुमान गरे भन्दा निकै धेरै हो ।’

नेपालमा २३८ वर्षदेखि शासन गर्दै आएको शाह वंशको राजतन्त्र २०६५ जेठ १५ गते संघिय गणतन्त्र नेपाल घोषणासँगै अन्त्य भएको थियो । 

गणतन्त्र घोषणाको १४ दिन पछि २०६५ जेठ २९ गते तत्कालीन राजा ज्ञानेन्द्र शाहले राजगद्दी र शासन जनतालाई सुम्पिएको घोषणा गर्दै दरबार छोडेका थिए । 

तर, यसरी दरबार छोडेको १६ वर्षपछि गत फागुन ७ गते प्रजातन्त्र दिवसको अघिल्लो दिन राजा ज्ञानेन्द्र शाहले प्रजातन्त्र दिवसको अवसर पारेर एक भिडियो सन्देश जारी गरे । 

जनताको हितका लागि आफूले जनताको नासो जनतालाई सुम्पिएको भन्दै बाहिरिएका शाहले सो दिन उक्त नासो जनताको हितका लागि पुनः फिर्ता लिने समय आएको सन्देश दिएका थिए । उनको सन्देशमा अहिलेको व्यवस्था र नेतृत्वबाट जनताको अवस्था परिवर्तन नभएको भन्दै आशय व्यक्त गरिएको थियो । 

ज्ञानेन्द्र शाहको यो अभिव्यक्ति पछि राजा फर्काउने एजेण्डा बोकेर बसेका राष्ट्रिय प्रजातन्त्र पार्टी तथा केही राजावादी संघसंगठनले औपचारिकरुपमै अब राजा फर्कीए भन्दै आफ्नो अभियान तिब्र पारेका थिए । 

त्यसपछि राजा देश दौडाहमा निस्किए, विभिन्न जिल्ला पुग्ने, मठ मन्दिर दर्शन गर्ने, नागरिकहरुसँग सेल्फी खिच्ने मात्रै होइन, पोखरामा आफ्ना स्वर्गीय दाजू राजा विरेन्द्र शाहको सालिक अनावरण नै गरे । पोखरामा उनको सो कार्यक्रममा पुरानो राष्ट्रिय गान ‘श्रीमान् गंभिर नेपाली...’ सार्वजनिक स्थालमै बजाइएको थियो ।

त्यस अघि बुटवलमा राजावादीको भव्य कार्यक्रम गरेका थिए । शनिवार मात्रै विरगञ्जमा राजाको सर्मथनमा बाइक ¥याली भएको थियो । राजाले समान्तार सत्ताको अभ्यास गरेर जनलहर उर्तान थालेपछि सत्ता र गणतन्त्र पक्षधर दलहरु झस्किएका थिए । 

यसैबीच माओवादीले आफ्नो तराई केन्द्रित राजनीतिक अभियान स्थगन गरेर काठमाडौँ फर्किएको छ भने अन्य दलका नेताहरुले पनि राजाको राजनीतिक कदमको विरोध गरेका छन् । 

कांग्रेस र एमाले मिलेर बनेको झण्डै दुई तिहाईको सरकारले जनताको हितमा काम गर्न नसकेको भन्दै चौतर्फी आलोचना भइरहेको बेला राजाको संक्रिया र अर्थपूर्ण गतिविधिले राजनीतिमा नयाँ तरङ्ग सृजना गरिएको छ । कतिपयले राजाको गतिविधिका कारण ‘कतै व्यवस्था नै त संकटमा पर्दै छैन ’ भनी आशङ्का समेत व्यक्त गरेका छन् ।