कांग्रेस नेताले सार्वजनिक जग्गा मिचेको भन्दै सुमनाले संसदमा ध्यानाकर्षण गराएपछि...

काठमाडौँ । राष्ट्रिय स्वतन्त्र पार्टीकी सांसद सुमना श्रेष्ठले एक कांग्रेस नेताले सरकारी जग्गा कब्जामा लिएको भन्दै संसदलाई ध्यानाकर्षण गराएकी छिन् । बुधबारको प्रतिनिधिसभा बैठकमा बोल्दै सांसद श्रेष्ठले तारकेश्वर नगरपालिका वडा नं ९ को लोकतान्त्रिक चोकमा रहेको जग्गा कांग्रेस नेताले कब्जामा लिएको बताएकी हुन् । 

Watch On

सरकारी जग्गा कब्जामा जाँदा स्थानीय सरकारले चासो नदिएको भन्दै उनले सरकारको ध्यानाकर्षण गराएकी हुन् । उनले भनिन्, ‘काठमाडौँ क्षेत्र नं ६ मा पर्ने तारकेश्वर नगरपालिका वडा नं ९ को लोकतान्त्रिक चोकमा रहेको मचाँगा नेपाल सरकारको नाममा रहेको जग्गा कित्ता नं ६२ र ६३ नेपाली कांग्रेसका नेताले कब्जामा लिई भोगचलन गर्दै आइरहेको र स्थानीबासीको गुनासो र उजुरीबा बाबजुत स्थानीय सरकारले उक्त जग्गा संरक्षणमा कुनै पहल नगरेको आम गुनासो छ । यसमा ध्यानाकर्षण गराएँ ।’

सांसद श्रेष्ठको आरोपपछि कांग्रेस सांसदहरुले उठेर आपत्ति जनाएका थिए । उनीहरुले सांसद श्रेष्ठको अभिव्यक्ति रेडर्कबाट हटाउन समेत माग गरेका थिए । सभामुख देवराज घिमिरेले प्रमाणित ढंगले आफ्नो अभिव्यक्ति राख्नुपर्ने बताएका थिए । यस विषयमा आएका बिवादलाई प्रक्रियागत ढंगले समाधान खोज्नुपर्ने भन्दै उहाले कांग्रेस सांसदहरुलाई बस्न आग्रह गरेका थिए । 

त्यसपछि कांग्रेस सांसदहरुले आसन ग्रहण गरेपछि सभामुखले बैठक अघि बढाएका थिए ।