सरकारलाई सोबिताको चुनौतीः  सबैको विचार अट्ने व्यवहार होस्, नत्र परिणाम जनताको पक्षमा हुनेछ!

काठमाडौँ । सबैको विचार अट्ने व्यवहार गर्न रास्वपा सांसद सोविता गौतमले सरकारलाई सचेत गराएकी छिन् । आजको प्रतिनिधि सभाको बैठकको शून्य समयमा बोल्दै सांसद गौतमले सरकारका नियन्त्रणमुखी शासनतर्फ देखिएको भन्दै सबैको विचार अट्ने व्यवहार नभएमा परिणाम जनताको पक्षमा हुने बताएकी हुन् ।

Watch On

गौतमले भनिन्:
"मैले पटकपटक भनेको छु— सरकार नियन्त्रणमुखी बाटोमा गइरहेको छ। म देख्छु, सरकार अत्यधिक सतर्क, असहिष्णु, र उदाउँदै गरेका नयाँ आवाजहरूलाई दमन गर्न उद्यत छ।
यसले के देखाउँछ? सरकारले जनविश्वास गुमाइसकेको छ र गम्भीर संकटमा छ! तर, यो संकट सरकार आफैं निम्त्याएको हो। 
सरकारले कानुनलाई न्यायको तराजु बनाउनुपर्ने थियो, तर प्रतिशोधको तरवार बनायो! उदाउँदै गरेका नयाँ शक्ति— जो यही गणतन्त्रमा जन्मिए, हुर्किए, र लोकतन्त्र जोगाउने पहिलो पंक्तिमा उभिन सक्थे, — उनैलाई झूटो मुद्दा लगाएर दमन गरिरह्यो।
सदनमा प्रश्नको जवाफ नदिने, उल्टो प्रश्न गर्ने सांसदलाई होच्याउने, पत्रकारहरूको पास खोस्ने, सामाजिक सञ्जाल नियन्त्रण गर्न विधेयक ल्याउने, निषेधित क्षेत्र घोषणा गरेर सडक कब्जा गर्ने— यी सबै नियन्त्रणमुखी शासनका लक्षण हुन्।
सरकारले सदन, सडक ,सामाजिक सञ्जाल,  सबै नियन्त्रण गर्न सक्ला  — तर जनताको चेतना नियन्त्रण गर्न सक्दैन! 
लोकतन्त्रको असली खतरा अरु कोही होइन सरकार आफैं हो।  सबैको विचार अट्ने व्यवहार गर्नुस्  नत्र परिणाम जनताको पक्षमा हुनेछ!
यो सरकारलाई नयाँ पुस्ताको चेतावनी हो!
धन्यवाद!"