विदाईको दिन समिरले साथीको सर्टमा लेखेः बालेन, रवि, कुलमान जस्तालाई काम गर्न नदिने मेरो देशमा हामी जस्ता युवाले कसरी गरी खानु ?

उदयपुर । करिब १५ वर्षको अध्ययनपछि विद्यालयको विदार्इमा एक–आपसमा भविष्यको शुभकामना दिइन्छ वा फेरि भेट्ने बाचा गरिन्छ । तर हालै उदयपुरको कटारी ४ मा रहेको त्रिवेणी माविबाट बिदाइ हुँदै गरेका कक्षा १२ का एक विद्यार्थीले आफ्नो साथीको सर्टमा लेखेको निकै छोटो तर भावनात्मक सन्देशलाई अहिलेको राजनीतिको चित्रका रुपमा हेरिएको छ । 

Watch On

कक्षा १२ को पढाई र परीक्षा सकिएको दिन त्रिवेणी माविका विद्यार्थीहरु सम्झनाका लागि कलेजको पोशाकमा साथीका लागि आफ्नो भावना शब्दमार्फत पोखिरहेका थिए । सोही क्रममा समिर विष्टले साथी कल्याण कार्कीको सर्टमा लेखे, ‘बालेन, रवि, कुलमान जस्तालाई काम गर्न नदिने मेरो देशमा हामी जस्ता युवाले कसरी गरी खानु ?’

सिधाकुरासँगको कुराकानीका क्रममा समीर विष्टले साथीको सर्टमा आफ्नो मनका भावना लेखेको बताए । अहिलेको केही गर्छु भनेर आएका युवाहरुलाई काम गर्न दिइएको छैन । १८ घण्टाको लोडसेडिङ हटाउने कुलमान जस्तालाई बिना कारण पद मुक्त गरेको, केही गर्छु भनेर आएका बालेन, रवि जस्ता राजनीतिका नयाँ शक्तिहरु लाई विभिन्न बहानामा दुःख दिएपछि आफ्नो मनमा युवाहरुका लागि यो देश बस्न लायक नै नरहेको भावना आएकाे समिर बताउँछन् । 

‘अहिलेको राजनितिलाई हामी जस्ता युवाले कसरी बुझ्ने ? सत्ता र शक्तिमा भएका लाई जोगाउने, अरूलाई फसाउने, बालेन, हर्क ,गोपी जस्ता स्वतन्त्र जितेका हरुलाई काम गर्न नदिने अहिलेको अवस्थाले हामी जस्ता युवालाई राजनीति प्रति बितृष्णा जागेको छ ।’ समिरले भने ।