हेटौँडा। सडकमा हिँडिरहेको डीआई गाडी सानो खाल्डोमा अड्किन्छ । चालकले गाडी कुदाउन खोज्छन् तर गाडी झन् दब्दै जान्छ । सेकेण्डमैै  सडकमा भ्वाङ पर्छ । चालक र सहचालक गाडीबाट निस्किन्छन् । क्षणभरमै सडक भासिएर ठुलो भ्वाङ पर्छ । हेर्दाहेर्दै गाडी गायब हुन्छ । 

प्रत्यक्षदर्शीले गाडी तान्न यताउता गुहार गर्दा गर्दै गाडी हराउँछ । यो घटना हुनु भन्दा अघिसम्म यो ठाउँ सामान्य अवस्थामा थियो । 

यो घटना शुक्रवार साँझ हेटौँडामा भएको हो । मकवानपुरको हेटौँडा उपमहानगरपालिका १६ र १७ को सिमानामा पर्ने गौरी गाउँमा माछाको दाना लिन हेटौँडा बजारतर्फ आउन लागेको गाडी खाल्डोमा भासियो । माछा पालिएको पोखरीको छेउमा रहेको कच्ची सडकको हिलोमा फसेको ना ४ च ४८३३ नम्बरको डीआई गाडी निकाल्ने क्रममा झन्झन् भित्र पसेर गायब भएको मकवानपुर प्रहरीले जनाएको छ । 

मकवानपुर प्रहरी प्रवक्ता प्रहरी नायब उपरीक्षक श्याम अर्यालका अनुसार गाडी ५ सेकेन्डभित्रै खाल्डोमा हराएको थियो । यो ठाउँमा पहिले बोरिङका लागि खाल्डो खनिए पनि पानी ननिस्काएपछि सानो खाल्डो यसै छोडिएको थियो । त्यही सानो खाल्डोले ठुलो घटना बनाएको स्थानीय बताउँछन् । 

सुरक्षाकर्मीले आज दिउसोभर खोज्दा पनि गाडी फेला पार्न नसकेपछि आजको खोजी कार्य रोकिएको प्रहरीले जनाएको छ ।