काठमाडौँ । सिन्धुलीको दुधौली नगरपालिका–१ का खिलबहादुर भुजेलले अज्ञात गिरोहले आफूलाई बेहोस बनाई भारत पुर्याएर किट्नी चोरिदिएको गुनासो गरेका छन् । 

निमार्ण क्षेत्रमा ज्यामी काम गर्दै आएका भुजेललाई पोखराबाट अन्जान व्यक्तीले राम्रो कमाई हुने कामको प्रलोभन देखाएर भारत पुर्याइ किड्नी झिकेर बेहोस अवस्थामै काठमाडौँ ल्याएर छाडेको बताएका हुन् । 

सिधाकुराको सम्पर्कमा आएको भुजेलका अनुसार उनी लामो समयदेखि सडक निमार्ण लगायतका काममा मजदुरी गर्दै आएका थिए । ठेकेदार कम्पनीले कामकै शिलिशिलामा पोखरा पुर्याएपछि पोखरामै बस्दै आएका थिए । 
असारमा केही व्यक्तीले आफूलाई भारतमा राम्रो काम र कमाई हुने भन्दै फकाएर गाडीमा राखेको बताउँछन् । भारतमा लगेर आफूलाई एउटा घर भित्र बन्दक बनाइ राखेको भुजेल बताउँछन् । उनका अनुसार उक्त घरमा उनले भाँडा माझ्ने, सफा गर्ने काम गर्थे । 

भुजेलले साउनको पहिलो साता नेपाल फर्कीन भन्दै आफूले त्यहाँ गरेको कामको पैसा मागे । त्यस दिन उनलाई कालो गाडीमा बस्न भनियो । त्यसपछि आफू एकै पटक साउन १० गते काठमाडौँको कंलकीस्थित सडक पेटीमा पल्टीरहेको अवस्थामा ब्यूँझिएको बताउँछन् । 

कोटेश्वरस्थित सुमो काउण्टरका साथीले गाडीको टिकट काटिदिएपछि उनी सिन्धुली घर पुगेको बताउँछन् । 

भुजेल आइतबार साँझ मात्रै सिन्धुली पुगेका थिए । तर घर पुुगेको केही बेरमा उनको कोखा दुख्न थाल्यो । परिवारलाई दुखेको ठाउँ देखाए । त्यहाँ लामो ब्यान्डेज गरिएको थियो । परिवारका सदस्य तथा गाउँलेहरुले उनको किड्नी झिकिएको आशंका गरे । 

भुजेलले भने आफूलाई केही पनि थाहा नभएको बताइरहेका थिए । आफूलाई भारत लगेको र एकै पटक काठमाडौँका फुटपाथमा ब्यूँझिएका बताए ।

रातभरी खिलबहादुरलाई निकै गाह्रो भयो । त्यसपछि सोमबार बिहानै उनलाई सिन्धुलीकै डकाहामा रहेको समिट माउन्टेन हस्पिटल र्पुयाइयो । त्यहाँका चिकित्सक डा.नवीन बयरले उनको ब्यान्डेज खोलेर सफा गर्न खोज्दा ३० वटा टाँका लगाएको देखे । 

खिलबहादुरको किड्नी झिकिएको हुन सक्ने आफन्तहरुको शंका झन् बढ्दै गएको थियो । डा.बयरलाई पनि शंका लागेपछि भिडिओ एक्सरे गरे । एक्सरे रिपोर्टले शंका पुष्टि गर्यो । खिलबहादुर भुजेलको देब्रेतिरको मृगौला देखिएन । 

त्यसपछि भने भुजेलले आफूलाई भारतमा बेहोस बनाई किड्नी झिकेर नेपाल पठाइदिएको भेउ पाएको बताए । 

सोमबार भुजेल परिवारले स्थानीय प्रहरीमा उजुरी दिएका छन् । सिन्धुली प्रहरीले पनि उजुरी आएपछि इन्सपेक्टर सिमोन धितालको टोलीले घरमै गइ खिलबहादुर भुजेलसँग घटना विवरण बुझेको छ । अहिलेसम्म भुजेलले भनेका कुरा बाहेक अन्य तथ्यहरु नखुलेको जनाएको छ । सिन्धुली प्रहरीले मानव बेचबिखन अनुसन्धान ब्यूरोसँग समन्वय गरेर अनुसन्धान अघि बढाएको जनाएको छ । 

मानव बेचबिखन अनुसन्धान ब्यूरोका प्रहरी वरिष्ठ उपरिक्षक कृष्ण प्रसाद पंगेनीका अनुसार सिन्धुलीको घटना ब्यूरोको नोटीसमा आएको आन्तरिकरुपमा अनुसन्धान सुरु गरेको बताए ।