रास्वपाले किन गर्यो सभामुखले बोलाएको बैठक बहिष्कार ?

काठमाडौँ । विघटित प्रतिनिधि सभाका सभामुख देवराज घिमिरेले संसद् विघटनपछि पहिलो पटक बोलाएको दलहरूको बैठक राष्ट्रिय स्वतन्त्र पार्टीले बहिष्कार गरेको छ । नेपाली काँग्रेस, नेकपा एमाले, माओवादी केन्द्र, राप्रपा सहितका दलहरूका प्रमुख सचेतकहरू बैठकमा सहभागी हुँदा रास्वपाका प्रमुख सचेतक सन्तोष परियार भने बैठकमा सहभागी छैनन् । 

Watch On

रास्वपाका एक पदाधिकारीका अनुसार सभामुख देवराज घिमिरेले बैठकको एजेन्डा नै संसद् पुनर्स्थापनाका लागि छलफल भएकाले रास्वपाले बहिष्कार गरेको बताए । उनले भने, 'सभामुखले बोलाएको बैठकको एजेन्डा नै संसद् पुनर्स्थापनाका लागि छलफल भन्ने छ, रास्वपा अहिले संसद् पुनर्स्थापनाका पक्षमा छैन, त्यसैले रास्वपाले सभमुखसँगको बैठक बहिष्कार गरेको हो ।'

उनका अनुसार भ्रष्टाचार र तत्कालीन सरकारका विरुद्धमा भएको प्रदर्शनपछि विघटित संसद्लाई पुनर्स्थापना गर्न खोज्नु भनेको फेरी तिनै दल र नेतालाई सत्ता चढाउने खेल भएकाले रास्वपा पुनर्स्थापनाको पक्षमा छैन । 
'भ्रष्टाचार र सरकारका अकर्मण्यताका विरुद्ध लड्दा दर्जनौँ सहिद भएका छन्, सडकमा रगत सुकेको छैन, फेरी संसद् ब्युँताउने प्रयास गर्नु भनेको परिवर्तनको विरुद्धमा उभिनु हो' उनले भने, 'हामी जेन-जीले खोजेको परिवर्तनको पक्षमा छौँ, निर्वाचनका लागि जुनसुकै छलफलमा बस्न तयार छौँ, संसद् पुनर्स्थापनाको माग रास्वपाले स्वीकार गर्दैन ।'

सभामुख देवराज घिमिरेले बोलाएको बैठकमा उपसभामुख इन्दिरा राना सहित नेपाली काँग्रेसका श्याम घिमिरे,एमालेका महेश बर्तौला,माओवादी केन्द्रका हितराज पाण्डे,राप्रपाका ज्ञानेन्द्र शाही,नेकपा एसका राजेन्द्र पाण्डे,जसपाकी रेखा यादवलगायत सहभागी छन् ।
सभामुखले बोलाएको बैठक विघटित प्रतिनिधि सभाको चौथो ठुलो दल रास्वपाले बहिष्कार गरेको छ ।