दिनदहाडै सिक्री लुट्ने एमालेका नेता, ब्यापारी अपहरणमा १२ वर्ष बसेका थिए जेल

काठमाडौँ । जेनजी आन्दोलनपछि काठमाडौँमा सिक्री ग्याङको बिगिबिगी निकै बढेको थियो । यो ग्याङका सदस्यले दिनहाडै महिलाको घाँटीबाट सिक्रि तानेर भाग्ने गर्थ्यो ।

Watch On

बाइक वा स्कुटरमा हिड्ने र पछाडी बसेको मान्छेले सडकमा हिंडेका मानिसहरुको सिक्री थुत्ने यो ग्याङबारे काठमाडौँ प्रहरी विशेष अपरेसन चलाईरहेको छ । 

यो ग्याङबारे हामीले केही दिनअघि पुरा विवरण सहित भिडियो बनाइसकेका छौँ । उक्त भिडियो हामीले कात्तिक १४ गते प्रसारण गरेको थियौँ । 

सो समयमा प्रहरीले काठमाडौँ उपत्यकामा भित्रभित्रै अपरेसन सञ्चालन गरिरहेको थियो । तर प्रहरीले अपरेसन चालु राखेकै समयमा पनि त्यो ग्याङका मानिसहरु सक्रिय रहेको पाइएको छ । 

यहाँ एउटा मात्र ग्याङ नभएर फरक फरक समूह लुटपाटमा संलग्न रहेको पाइएको छ । आज हामी सिक्रि ग्याङको अर्को समूह र त्यो तिनका राजनीतिक कनेक्सनबारे खुलासा गर्दैछौँ । 

मंसिर १ गते । साढे तीन बजे आसपासको समयमा काठमाडौँको नागार्जुन नगरपालिका–३ स्थित ठूलो भर्याङको एक महिला हिडिरहेकी थिइन् । बारा स्थायी घर भएकी ति महिलाले घाँटीमा डेढ तोलको सिक्री लगाएकी थिइन् । 

स्कुटरमा रहेका २ जनाले ति महिलाले लगाएको सिक्रीमाथि आँखा गाढेका थिए । ति महिला बाटोमा हिंडिरहेकै समयमा स्कुटरमा आएका २ जनाले ति महिलाको घाँटीबाट सिक्री तानेर केही समयमै बेपत्ता भए । 

महिलाले प्रहरीमा उजुरी दिइन् । प्रहरी बृत्त स्वयम्भूले केही हप्तादेखिनै सिक्रि ग्याङबारे अनुसन्धान गरिरहेको थियो । यो समूहले काठमाडौँको रानीवन, खरिबोट, ठूलोभर्याङ आसपासको क्षेत्रमा आतंक नै मच्चाएको थियो । यसअघी पनि प्रहरीले सो क्षेत्रमा लुटपाट गर्ने समूहका ५ जनालाई पक्राउ गरेको थियो । 

प्रहरीले महिलाको सिक्री लुटिएको ठूलो भर्याङ क्षेत्रको चोक चोकमा राखिएको क्यामेराको फुटेज केलायो । महिलाले उपलब्ध गराएको विवरण र हुलियाको आधारमा स्कुटरको खोजी ब्यापक बनायो । र अन्नतः प्रहरी चोर को हो भन्ने निष्कर्षमा पुग्यो । 

स्वयम्भू बृत्तको टोलीले मंसिर ९ गते काठमाडौँकै तारकेश्वर नगरपालिका ८ जरङ्खुबाट रातको ८ बजे एकजना सिक्री चोरलाई पक्राउ गर्यो । ति सिक्री चोर हुन लमजुङको दोर्दी गाउँपालिका ७ घर भएका टासी गुरुङ । 

जब प्रहरीले उनी बस्ने घरको तलासी गर्यो त्यसले थप शंका उत्पन्न गरायो । उनको घरबाट अटो पेस्तोल १ थान, पेस्तोलाको म्याग्जिन  १ थान, सोही पेस्तोलको गोली ६ थान, पेस्तोल पोज १ थान, प्रदेश ०३–००५ प ४०७१ नम्बरको कालो रङको होण्डा डियो स्कुटर, खुकुरी एक थान, औँठी १ थान, लुटपाट गर्दा प्रयोग भएको कपडा, जुत्ता फेला पार्यो । 

ति लुटेराले सिक्री लुट्ने समय र अरु समयमा स्कुटरको फरक–फरक नम्बर प्लेट प्रयोग गरेको पाइएको छ । टासी गुरुङले सिक्रि लुट्ने समयमा प्रदेश ३०२–००४ प २७३५ नम्बरको प्लेट प्रयोग गरेका थिए । प्रहरीले उनको घरबाट सो नम्बर प्लेट पनि बरामद गरेको छ । 

घरबाट पेस्तोल, म्याग्जिन गोली समेत बरामद भएपछि उनी सिक्री मात्र नभएको आशंका प्रहरीले गर्यो । उनको पृष्ठभूमी जाँच गर्दा नभन्दै प्रहरीको आशंका सही सावित भयो । उनी नेपालको बहुचचर्चित अपहरणको हिस्सा भएको खुलेको छ ।
 
उनले २०६५ सालमा काठमाडौँका एक व्यापारीको अपहरणमा संलग्न रहेका थिए । भारतीय नागरिक उदय सेट्टीको योजनामा ४/५ जनाको समूहले मारुती गाडीमा हाली अपहरण गरेका थिए । ति व्यापारी अपहरणमुक्त भएपछि मात्रै प्रहरीले उनी अपहरणमा परेकोबारे थाहा पाएको थियो । अपहरणकारीले तत्कालिन समयमा ब्यापारीबाट ५० लाख रुपैयाँ धरौटी माग गरेका थिए । 

त्यतिबेला सोल्टी भनेर चिनिने टासी १२ वर्ष जेल सजाय र १ लाख ५० हजार जरिवाना तिरेर २०७७ सालमा कारागारबाट निस्केका थिए ।

जेलबाट निस्केपछि निजले लमजुङ जिल्लामा ठेक्का पट्टा तथा मस्र्याङदी खोलाबाट बालुवा,गिट्टी, ढुंगा उत्खनन गरी बिक्री गर्ने काम कार्य गरेका थिए । 

अझ अर्को रहस्यमयी कुरा त के छ भने उनी जेलबाट छुटेलगत्तै एमालेको राजनीतिमा सक्रिय भए । त्यो पनि सामान्य समर्थक वा कार्यकर्ताका रुपमा होइन युवासंघको केन्द्रीय सदस्यका रुपमा ।

२ पटक युवासंघको केन्द्रीय सदस्य बनेका टासि २०७९ को चुनाबमा पेस्तोल नै बोकेर खटिएको प्रहरीको भनाई छ । एमाले नेताहरुको सुरक्षाका लागि भन्दै उनी पेस्तोल बोकेर हिंडेका थिए । 

र अहिले तिनै टासी गुरुङ सिक्री चोर पनि भएको पाइएको छ । मंसिर १ गते एनपिएल क्रिकेट हेर्न भनि क्रिकेट रंगशाला पुग्दा प्रवेश टिकेट नपाएपछि फर्किने क्रममा हलचोक स्थित शिवम होटेल नजिक गल्लीमा सिक्री लुटपाट गरी फरार भएका थिए । 

सोही घटनामा संलग्न नुवाकोटको शिवपुरी गा पा २ तारा गाँउ स्थायी घर भई हाल काठमाण्डौँको टोखा नगरपालिका १० सामाखुसी टोखा रोड बस्ने ५० वर्षीय अनिल भन्ने मानदेव गुरुङ  र लुटपाटको सुन खरिद गर्ने काठमाडौँको ईचङ्गुका ४३ वर्षीय शुशिल लामालाई समेत पक्राउ गरिएको छ । उनीहरुलाई टासीको बयानपछि मंसिर १० गते पक्राउ गरिएको हो ।  उनीहरुको बारेमा विस्तृत अनुसन्धान भईरहेको प्रहरीले जनाएको छ ।