मन्त्रीबाट राजीनामा दिएपछि रवि लामिछानेसँग कुलमानको ३ घण्टा वार्ता: के भयो छलफल ?

काठमाडौँ । राष्ट्रिय स्वतन्त्र पार्टी रास्वपा र पूर्व मन्त्री कुलमान घिसिङबिच भेटवार्ता भएको छ । सरकारबाट राजीनामा दिएपछि घिसिङले आज सभापति लामिछानेसँग बुढानीलकण्ठस्थित निवासमै पुगेर भेटवार्ता गरेका हुन् । 

Watch On

रास्वपा र उज्यालो नेपालबिच एकताको सहमति भएपछि पार्टी समायोजनमा देखिएको अलमल अन्त्य गर्न सभापति लामिछाने र घिसिङबिच वार्ता भएको स्रोतले जनाएको छ ।

'बाहिर चर्चा भएजस्तो अवस्था होइन', स्रोतले भन्यो 'पुराना शक्तिविरुद्ध लड्न एक भएर जाने कुरामा दुई मत छैन, एकता पूर्व नै उज्यालो नेपालको केन्द्रीय समिति पनि ठुलो भइसकेकोले कसरी व्यवस्थापन गर्ने भन्ने विषयमा नेताहरूबिच छलफल भएको हो ।'

उज्यालो नेपाललाई केन्द्रीय समितिमा समाहित गर्न सदस्यसँख्यामा विवाद भएको भनिए पनि लामिछाने र घिसिङले यसलाई समाधान गरेको जनाइएको छ । स्रोतका अनुसार पूर्व सहमति अनुरूप नै अघि बढ्ने र चरणबद्धरुपमा क्षमताका आधारमा पार्टीमा जिम्मेवारी दिने विषयमा दुवै नेताले एकमत बनाएर निस्किएका छन् ।

साथै फागुन २१ को प्रतिनिधिसभा निर्वाचनमा उम्मेदवार छनोटका विषयमा समेत कुनै नेताको समूहबाट नभई आकाङ्क्षीहरू मध्येबाट उत्कृष्टलाई उम्मेदवार बनाउने तयारी गरिएको छ । स्रोतले भन्यो, 'कोही उम्मेदवार यो समूहबाट भन्ने हुँदैन जो हुन्छ रास्वपाको उम्मेदवार हुन्छ ।' 

साथै समानुपातिक सूचिमा देखिएको विवादलाई समेत आजै टुङ्गाएर अन्तिमरुप दिने तयारी गरिएको  छ । साथै 'अब केही दिनभित्रै तीनै नेताको उपस्थितिमा घोषणा सभाको समेत तयारी चलिरहेकाले बाहिर चर्चामा आएजस्तो समस्या छैन, हुँदैन' रास्वपा उच्च स्रोतले भन्यो