चितवनको सभामा बालेनले के-के मुद्दा उठाए ?

चितवन । राष्ट्रिय स्वतन्त्र पार्टीका वरिष्ठ नेता बालेन्द्र शाह बालेनले चितवनवासीले भोग्नु परेका समस्या उठाउँदै ती समस्या समाधानका लागि रास्वपालाई मत मागेका छन्। 
बालेनले चितवनका पर्यटन व्यवसायीको मुद्दा उठाए, चितवनका किसानका मुद्दा उठाए, चितवनका उद्योगीको मुद्दा उठाए । 

आफूलाई चितवनको पर्यटनमा ध्यान दिन आग्रह गरिएको बताउँदै बालेनले भने– चितवनले पर्यटन प्रबद्र्धन गर्न विश्वलाई सिकाउनुपर्छ । ‘मेसीलाई फुटबल खेल्न सिकाउनुपर्छ ? रोनाल्डोलाई फुटबल खेल्न सिकाउनुपर्छ ? चितवनले अब देशलाई पर्यटन प्रवद्र्धन गर्न सिकाउनुपर्छ, टुरिजम प्रमोसन चितवनले सिकाउनुपर्छ।’ बालेनको भनाइ थियो। 

Watch On

चितवनका किसानले आफ्ना उत्पादनको बजार नपाएको, उचित मूल्य नपाएको, सीमापारीबाट सस्तोमा तरकारी ल्याएर त्यहाँका किसानलाई मारमा पार्ने काम भइरहेको उल्लेख गर्दै उनले अब त्यसलाई हटाउनैपर्ने बताए । ‘यहाँ उत्पादित तरकारीलाई कोल्ड स्टोरमा राख्नुपर्छ, पूर्वदेखि पश्चिमसम्मको तरकारी स्टोर गर्ने कोल्ड स्टोर हब बन्न सक्छ चितवन’ उनले भने । 

रास्वपाबाट भावी प्रधानमन्त्रीका रुपमा घोषणा गरिएका बालेनले नेपाल हेटौंडा सिमेन्ट कारखाना जस्तै भएको उल्लेख गरे । हाम्रो देश हेटौंडा सिमेन्ट कारखाना जस्तैछ, मेसिन पनि छ, जनशक्ति पनि छ, तर चल्दैन, यसलाई पनि कांग्रेसको चाउचाउ (कांग्रेस उम्मेदवार विनोद चौधरीको  वाईवाई चाउचाउ) जस्तै चल्ने बनाउनुपर्छ, उनले भने। 

रास्वपा वरिष्ठ नेता बालेनले चितवनबाट पार्टी सभापति नै चुनाव लडेकाले अब चितवनका मतदाताले चिन्ता गर्नै नपर्ने उल्लेख गरे।