हार स्विकार्दै रेणु दाहालले भनिन् ‘मन त जिते, तर मत जित्न सकिनँ’

काठमाडौँ । प्रतिनिधिसभा निर्वाचनमा चितवन–३ मा पराजित भएकी रेणु दाहालले आफूले काम द्वारा जनताको मन जिते पनि मत जित्न भने नसकेको बताएकी छन् ।

चितवन ३ मा दाहाल राष्ट्रिय स्वतन्त्र पार्टीका उम्मेदवार सोविता गौतमसँग ३८ हजार ६ सय ६२ मतसहितको फराकिलो मतान्तरले पराजित भएकी हुन । दाहालले शनिवार सामाजिक सञ्जाल फेसबुकमा एक देश लेख्दै सो कुरा बताएकी हुन । उनले भनेकी छन्, ‘मैले काम द्वारा तपाईँहरूको मन त जिते तर मत जित्न सकिनँ। मत जित्ने मा.सविता गौतमलाई धेरै धेरै बधाई भन्न चाहन्छु। प्रिय चितवनवासीको मत पक्कै खेर जानेछैन। आगामी दिनमा काम द्वारा जनतामा खुसीयाली र चितवनको थप विकास र समृद्धि का लागी शुभकामना व्यक्त गर्दछु।’

Watch On

त्यस्तै, उनले सुनामीको लहडमा पनि विश्वास गरेर मतदान गरेका सबै मतदाताहरू प्रति ऋणी रहेको र उनीहरूको यस गुनलाई आफूले कहिल्यै नबिर्सने बताएकी छन् । त्यस्तै पूर्व भरतपुर महानगरपालिका प्रमुख समेत रहेकी दाहालले जनताका आवश्यकता, चाहाना पुरा गर्नु नै आफ्ना सपना ठानेका कारण महानगरको प्रमुखबाट राजीनामा दिएर संसदीय निर्वाचनमा होमिएको बताएकी छन् ।

उनले भनेकी छन्, ‘झन्डै ३० वर्षे मेरो राजनीतिक जीवनकालमा भरतपुरमा मैले मेरो जीवनको ऊर्जाशील ९ वर्ष यस ठाउँको विकास, समृद्धि र सुशासनका लागि समर्पित गरेँ। मलाई लाग्यो विकासका लागी जनताका पक्षमा राम्रा नीति नियम नहुनाले कामहरू असहज भईरहेका छन्। त्यसका लागि म १५ महिना नगर प्रमुखको कार्यकाल बाँकी छदै बाहिरिएर प्रतिनिधिसभा निर्वाचन चितवन ३ बाट उमेदवारी दिई निर्वाचनमा होमिएँ।’

दाहालले प्राप्त मत परिणामलाई स्विकार्ने र जनताको अमूल्य मतको सम्मान गर्ने बताएकी छन् । त्यस्तै चुनावी अभियानमा निरन्तर सक्रिय र उत्साहका साथ खट्नुहुने नेपाली कम्युनिस्ट पार्टीका नेता कार्यकर्ता तथा सम्पूर्ण समर्थक शुभचिन्तक एवं मिडियाकर्मी ,कलाकारहरू प्रति विशेष आभार प्रकट समेत व्यक्त गरेकी छन् ।