बालेनले इतिहास रच्दा छड्के किनाराका साक्षी ओली

काठमाडौँ । रास्वपा वरिष्ठ नेता बालेन्द्र शाह (बालेन) ले माघ ६ गते झापा ५ मा प्रतिनिधिसभा सदस्यका लागि उम्मेदवारी दर्ता गराउँदा एमाले अध्यक्ष केपी ओलीले भनेका थिए– कोही कोही यहाँ सिँगौरी खेल्न आएका छन्, सिङ भाँचेर फर्किने छन्।’ तर, फागुन २३ गते साँझ मतपरिणाम सार्वजनिक हुँदा काठमाडौँबाट झापा पुगेका बालेनको होइन, उनै ओलीको ‘सिङ’ भाँचियो ।

झापा ५ बाट प्रतिनिधि सभा सदस्य निर्वाचित हुँदा बालेनले एकै चोटी दुईटा इतिहास रचेका छन् ।

Watch On

एउटा– संसदीय इतिहासमै सर्वाधिक मत ल्याएर सांसद निर्वाचित भए । बालेनले ६८ हजार ३४८ मत ल्याए, जुन नेपालमा सांसद निर्वाचित हुँदा हालसम्म कुनै पनि उम्मेदवारले पाएको सबैभन्दा बढी मत हो ।

अर्को– रास्वपाबाट भावी प्रधानमन्त्री घोषित बालेनले जेनजी आन्दोलनबाट अपदस्थ प्रधानमन्त्री ओलीलाई पराजित गरे, त्यो पनि भारी मतान्तरले । ओलीले जम्मा १८ हजार ७३४ मत पाए।

जेनजी आन्दोलन पीडितहरुलाई न्याय दिन झापाबाट उम्मेदवार बनेको प्रतिक्रिया बालेनले यसअघि नै दिइसकेका थिए । चुनावी नतिजाअनुसार बालेनले राजनीतिक रुपमा जवाफ दिइसकेका छन् । अब नयाँ सरकारको नेतृत्व गरेपछि उनै बालेनमा जेनजी आन्दोलनका दोषीलाई कानुनी रुपमा नै जवाफ दिने दायित्व रहने छ ।

ओली आफैं पनि भावी प्रधानमन्त्रीका उम्मेदवार थिए । आफ्नो पार्टी एमालेबाट उनले आफैंलाई भावी प्रधानमन्त्रीका रुपमा निर्णय गराइसकेका थिए । दुई भावी प्रधानमन्त्रीको प्रतिस्पर्धामा ओली यसरी चिप्लिए कि सम्भवतः आगामी चुनावमा ओली उम्मेदवार नै नबन्न सक्छन् ।

पुराना दल र तिनका नेतामध्ये ओली सबैभन्दा बद्नाम पात्र हुन् । उनै ओलीले जेनजी आन्दोलनलाई लिएर बालेन र रास्वपा सभापति रवि लामिछानेलाई बद्नाम गर्न खोजी रहे । तर, सकेनन् । ओलीको बोलीलाई जनताले पत्याएनन् ।

ओलीका परम्परागत मतदाताले नै घण्टीमा भोट हालेर बालेनलाई जिताए । झापा ५ का मतदाताले आफूलाई हराएर बालेनलाई जिताउँदै छड्के किनाराका साक्षी स्वयम् ओली नै बने ।

बालेनले नयाँ सरकारको नेतृत्व गर्दा ओलीका लागि संसदको ढोकासमेत बन्द भएको छ । ओली त संसदमा हुने छैनन् नै, उनले नेतृत्व गरेको दल एमालेको समेत कमजोर संसदमा कमजोर उपस्थिति हुने छ । विगतमा आफूले जे बोल्यो त्यही ठीक हो भन्ने ओलीलाई जनताले चुनावबाटै गलत हुन् भन्ने प्रष्ट सन्देश दिएका छन् ।