कांग्रेसको एजेण्डा– हार स्वीकार्ने, सभापतिको राजीनामा नस्वीकार्ने

काठमाडौँ । नेपाली कांग्रेस केन्द्रीय समितिको बैठक आज पनि बसिरहेको छ । आजको बैठक शुक्रबार सुरु भएको बैठककै निरन्तरता हो ।

चुनावमा लज्जास्पद पराजय व्यहोरेको कांग्रेसले चुनावी समीक्षाका लागि बैठक बोलाएको हो र बैठकमा चुनावमा किन यस्तो अनपेक्षित परिणाम आयो भनेर छलफल चलिरहेको छ । सँगै विशेष महाधिवेशनबाट निर्वाचित सभापति गगनकुमार थापाको राजीनामा स्वीकृत गर्ने वा नगर्ने भन्ने विषयमा पनि छलफल भइरहेको छ ।

Watch On

कांग्रेस प्रवक्ता देवराज घिमिरेले भनेका छन्– यो बैठकका मुख्य २ एजेण्डा हुन्, पहिलो– चुनावको समीक्षा गर्ने, दोस्रो– सभापतिको राजीनामा ।

बैठकको पहिलो दिन नै उपसभापति विश्वप्रकाश शर्माले १४ पृष्ठको प्रतिवेदन पेश गर्दै चुनावमा पराजय भोग्नुका कारण खुलाएका थिए । उपसभापति शर्माले प्रतिवेदनमा भनेका छन्– अल्गोरिदम र पपुलिजमका कारण कांग्रेसले पराजय भोग्नु पर्यो ।

सभापति थापाको राजीनामा स्वीकृत गर्न नहुने विषयमा उनले ७ बुँदे तर्क पेश गरेका छन् । उनले भनेका छन्– नयाँ नेतृत्वलाई ५० दिनको समय पर्यापत भएन ।

केन्द्रीय समितिको जारी बैठकमा बोल्ने अधिकांश केन्द्रीय सदस्यहरुले पनि उपसभापति शर्माको तर्कमा सहमति जनाउँदै सभापति थापाको राजीनामा केन्द्रीय समितिबाटै अस्वीकृत गर्नुपर्ने धारणा राखिरहेका छन् । जुनसुकै कारणले होस्, चुनावमा हारियो, लोकतान्त्रिक पार्टीले जनमतलाई स्वीकार्नुपर्छ– केन्द्रीय सदस्यहरुको मत छ ।

केन्द्रीय समितिमा हालसम्म व्यक्त भएका धारणाका आधारमा यो बैठकका मुख्य दुई एजेण्डा छन्– एउटा हार स्वीकार गर्ने, दोस्रो सभापतिको राजीनामा नस्वीकार्ने । विशेष महाधिवेशनबाट बनेको केन्द्रीय समितिले सभापति थापाको नेतृत्वमा नै नियमित महाधिवेशन गराउन चाहन्छ ।