कांग्रेसको अपदस्थ केन्द्रीय समितिको बैठक कहिले ?

सिधाकुरा

आइतबार, चैत ८, २०८२

कांग्रेसको अपदस्थ केन्द्रीय समितिको बैठक कहिले ?

काठमाडौँ । कांग्रेस केन्द्रीय कार्यालयमा चुनावी समीक्षा भइरहेका विशेष महाधिवेशनबाट अपदस्थ केन्द्रीय समिति सक्रिय हुन थालेको छ । अपदस्थ केन्द्रीय समितिको छुट्टै बैठक बोलाउने तयारी सुरु भएको छ ।

निवर्तमान कार्यबाहक सभापति पूर्णबहादुर खड्काको नेतृत्वमा आज निवर्तमान सभापति शेरबहादुर देउवा र नेता शेखर कोइराला पक्षका नेताहरुको बैठक बसेको छ । बैठकले चोधौं महाधिवेशनबाट निर्वाचित केन्द्रीय समितिको बैठक बोलाउने निर्णय गरेको नेता मीन विश्वकर्माले जानकारी दिए ।

Watch On

बैठकको मिति र स्थान तोक्ने जिम्मेवारी खड्कालाई दिएका छौं– विश्वकर्माले भने– उहाँले तोकेको मिति र स्थानमा चोधौं महाधिवेशनबाट निर्वाचित केन्द्रीय समितिको बैठक बस्छ ।

जेनजी आन्दोलनपछि तत्कालीन सभापति शेरबहादुर देउवाले खड्कालाई कार्यबाहक सभापतिको जिम्मेवारी दिएका थिए । खड्कालाई जिम्मेवारी दिए पनि निर्णयहरु भने देउवाकै सल्लाहमा हुने गरेको थियो । देउवा हाल स्वदेशमा छैनन् । सिंगापुरमा उपचार गरेर उनी थप उपचार र पारिवारिक कार्यक्रमका लागि भन्दै हङकङ पुगेका छन् ।

निवर्तमान कार्यबाहक सभापति खड्काको नेतृत्वमा आज बसेको बैठकमा नेता शेखर कोइरालासहित उनी पक्षधर नेताहरु पनि सहभागी थिए ।

प्रकाशित मिति: आइतबार, चैत ८, २०८२

प्रतिक्रिया दिनुहोस्