एमाले कसरी सुधार्ने ? योगेशले मागे देश–विदेशबाट सुझाब

काठमाडौँ । नेकपा एमालेका उपमहासचिव योगेश भट्टराईले एमालेलाई सुधार्ने उपाय खोज्दै देश, विदेशबाट सुझाब माग गरेका छन् । भट्टराईले आज सामाजिक सञ्जालमार्फत सुझाब माग गरेका हुन् ।

उनले निर्वाचनको परिणामले एमालेलाई ठुलो धक्का लागेको उल्लेख गर्दै  पार्टी किन यो हालतमा पुग्यो ? भन्ने प्रश्न गरेका छन् । उनले पार्टीले बेहोर्नु परेको हारको वस्तुनिष्ठ समीक्षा हुनुपर्ने पनि उल्लेख गरेका छन् ।

Watch On

एमालेमा चुनावी समीक्षाका लागि केन्द्रीय कमिटी बैठकको माग भइरहेको छ । तर, महासचिव शंकर पोखरेलले सबै क्षेत्रबाट प्रतिवेदन प्राप्त भएपछि मात्रै बैठक बस्ने बताउँदै आएका छन् ।

उपमहासचिव भट्टराईले आग्रह भन्दा माथि उठेर समीक्षा गरिनु पर्ने बताएका छन् । ‘एमालेको एकता, रूपान्तरण, पुर्नगठन र पुनर्जागरणका लागि नयाँ संकल्प सहित अघि बढ़नु पर्दछ । समीक्षा मार्फÞत जिम्मेवारी किटान गर्नुका साथै जवाफदेहिताको प्रश्न हल हुनेछ । यसका लागि निम्न विषयमा राय, सुझाब, टिप्पणी पठाउन अनुरोध गर्दछु ।’ भट्टराईले फेसबुकमार्फत आग्रह गरेका छन् ।

भट्टराईले सुझाब मागेका विषयहरु
१. निर्वाचनमा एमालेको कमजोर परिणाम आउनुमा कुन कुन कारण होलान? र किन? ( नीति, नेतृत्व, संगठन, व्यवहार, कार्यशैली, व्यवस्थापन, एजेण्डा, प्रचार आदि) आन्तरिक र बाह्य कारण ? 
२. एमालेको रूपान्तरणका लागि कुन कुन पक्षमा के के सुधार गर्नु पर्ला? सुधारका प्रस्ताव सहित । अनि रूपान्तरणको विधि र प्रक्रिया बारेमा । 
३. एमालेका सबल र कमजोर पक्ष अनि एमालेको संभावना ।