साउनदेखि कसको तलब कति ?

काठमाडौँ । सरकारले सबै तहका कर्मचारीको तलब बढाएको छ । अर्थमन्त्री डा. स्वर्णिम वाग्लेले आज संसदमा आगामी आर्थिक वर्षका लागि बजेट प्रस्तुत गर्दै कर्मचारीको तलब समग्रमा २१ प्रतिशतले वृद्धि गरेको घोषणा गरेका हुन् ।

सरकारले आज बजेट वक्तव्यमार्फत तलब वृद्धिको घोषणा गरे पनि नयाँ तलबमान भने आगामी साउनदेखि लागु हुने छ ।

Watch On

अर्थमन्त्रीको घोषणाअनुसार सबै तहका कर्मचारीको आधारभूत तलब १० प्रतिशतले बढाइएको हो । यसका अतिरिक्त उनीहरुले कार्यसम्पादनका आधारमा १० प्रतिशत प्रोत्साहन भत्ता पाउने छन् । योसँगै यसअघि दिइँदै आएको महँगी भत्तालाई पनि कायम राखिएको छ ।

सरकारी सेवाको सबैभन्दा तल्लो तहका कर्मचारी अर्थात कार्यालय सहयोगीले अब ४० हजार मासिक तलब पाउने छन् । हाल कार्यालय सहयोगीको तलब २७ हजार ६१२ रुपैयाँ छ ।

निजामति कर्मचारीको सबैभन्दा उच्च तह अर्थात मुख्यसचिवले अब १ लाख ४ हजार ८७ रुपैयाँ मासिक तलब बुझ्ने छन् ।

त्यसैगरी विशिष्ट श्रेणी अर्थात सचिवहरुको तलब ९७ हजार ५ सय ५ रुपैयाँ पाउने छन् भने अतिरिक्त सचिवले (पेन्सन प्रयोजन) ७८ हजार १ सय ९२ तलब बुझ्नेछन् ।

त्यस्तै, सहसचिवले ८८ हजार २१४, उपसचिवले ७८ हजार २६७ र शाखा अधिकृतले ७० हजार ६ सय ७९ रुपैयाँ मासिक तलब बुझ्ने छन् ।

शिक्षा तथा सुरक्षा सेवामा पनि यही अनुपातमा तलब वृद्धि हुने छ ।