बजेट छलफलमा अवरोधः अर्थमन्त्रीलाई प्रतिनिधिसभाले रोष्टममा जान दिएन, राष्ट्रिय सभाले के गर्ला ?

काठमाडौँ । अगामी आर्थिक वर्ष ०८३/०८४ को राजस्व र व्ययको वार्षिक अनुमान (बजेट) जेठ १५ मा संघीय संसदमा प्रस्तुत गरेका अर्थमन्त्री डा. स्वर्णिम वाग्ले त्यसयता संसदको रोष्टममा जान पाएका छैनन् । 

संघीय संसदको दुबै सदन प्रतिनिधिसभा र राष्ट्रिय सभामा विपक्षीको अवरोधले अर्थमन्त्री वाग्ले आफूले ल्याएको २१ खर्ब २४ अर्ब ३४ करोडको बजेटलाई पारित गराउने प्रक्रियामा अगाडि बढाउन सकेका छैनन् । 

Watch On

प्रतिनिधिसभामा १८ जेठबाटै बजेटमाथिको छलफल अगाडि बढाउने तयारी थियो । तर, प्रधानमन्त्री बालेन्द्र शाहको सीमासम्बन्धी अभिव्यक्तिलाई लिएर विपक्षीको अवरोधले बैठक नै चल्न नसक्दा अर्थमन्त्री वाग्लेले रोष्टममा गएर 'आर्थिक वर्ष ०८३/०८४ को राजस्व र व्ययको वार्षिक अनुमान (बजेट) सामान्य छलफल गरियोस्' भन्ने प्रस्ताव प्रस्तुत गर्न पाएका छैनन् । 

१९ गतेको बैठकमा पनि अवरोध कायमै रहँदा बजेट छलफल प्रक्रियामा जान सकेन । सभामुख डोल प्रसाद अर्यालले जेठ २५ गतेसम्मका लागि प्रतिनिधिसभा बैठक स्थगित गरिदिएका छन् । 

प्रतिनिधिसभाको रोष्टमबाट बजेट छलफल अगाडि बढाउने प्रस्ताव राख्न नपाएका अर्थमन्त्री वाग्लेले आज राष्ट्रियसभामा यो प्रस्ताव राख्ने कार्यसूची छ ।

 दिउँसो १२:१५ बजे बस्ने बैठकमा वाग्लेले रोष्टमबाट आर्थिक वर्ष ०८३/०८४ को राजस्व र व्ययको वार्षिक अनुमान (बजेट) सामान्य छलफल गरियोस् भन्ने प्रस्ताव राख्ने र छलफल प्रारम्भ हुने कार्यसूची छ । तर, प्रतिनिधिसभामा प्रधानमन्त्रीको सीमासम्बन्धी अभिव्यक्तिलाई लिएर १८ र १९ गतेको बैठक अवरोध गरेकाले आज विपक्षी दलले राष्ट्रियसभा चल्न दिने अवस्था छैन । 

यद्यपि राष्ट्रिय सभा अध्यक्ष नारायण दाहालले प्रधानमन्त्रीको अभिव्यक्तिको विवाद प्रतिनिधिसभाको भएकाले यो विषय उतैलाई छोडिदिएर बैठक सञ्चालन गर्न दलहरुसँग छलफल गरिरहेका छन् । छलफलमा विपक्षी दल कन्भिन्स भए अर्थमन्त्री वाग्लेले बजेट छलफल अगाडि बढाउने प्रस्ताव रोष्टमबाट पेस गर्न पाउनेछन् । 

विपक्षीकाे अवराेध जारी रहे असार मसान्तभित्र बजेट पारित नभए देश बजेट होलिडेमा जाने खतरा हुन्छ । यस्तो भएमा राज्य सञ्चालनमा प्रभाव पर्न सक्छ । 

राष्ट्रिय सभामा अवरोध हटाउन सरकारका तर्फबाट कानुन न्याय तथा संसदीय मामिला मन्त्री सोबिता गौतमले पनि सम्वाद गरिरहेकी छिन् । 

राष्ट्रियसभामा बजेटका साथै अर्थमन्त्री वाग्लेले नै प्रतिनिधिसभाबाट सन्देशसहित प्राप्त वैकल्पिक विकास वित्त परिचालन विधेयकमाथि विचार गरियोस् भन्ने प्रस्ताव पेस गर्ने कार्यसूची समेत छ ।