प्रतिनिधि सभाबाट आज बजेट पारित हुने

काठमाडौँ । प्रतिनिधि सभाको बैठक विहान ११ बजे बस्दैछ । बैठकले बजेट आश्रित विधेयकहरु पारित गर्ने कार्यसूची छ । 

आगामी आर्थिक वर्ष ०८३/०८४ को बजेटका लागि १५ जेठमा सरकारले विनियोजन विधेयक, आर्थिक विधेयक र राष्ट्र ऋण उठाउने विधेयक संसदमा पेस गरेको थियो । विनियोजन विधेयक ४ असारमा पारित भइसकेको छ । बाँकी दुई विधेयक आज पारित गर्ने कार्यसूची छ । 

Watch On

संसद सचिवालयकाअनुसार आजको बैठकमा आर्थिक विधेयक २०८३ माथि प्राप्त संशोधनसहित छलफल हुनेछ । संशोधनहरुलाई निर्णयार्थ प्रस्तुत गरिनेछ । अर्थमन्त्री वाग्लेले आर्थिक विधेयक पारित गरियोस् भनेर प्रस्ताव प्रस्तुत गर्नेछन् । विधेयक आजै पारित गर्ने कार्यसूची छ । 

त्यसपछि अर्थमन्त्री वाग्लेले राष्ट्र ऋण उठाउने विधेयकमाथिको दफावार छलफल सदनमा गरियोस् भनी प्रस्ताव प्रस्तुत गर्नेछन् । छलफलपछि यो विधेयकमाथि परेका संशोधनहरुलाई निर्णयार्थ प्रस्तुत गरिनेछ । अनि अर्थमन्त्री वाग्लेले राष्ट्र ऋण उठाउने विधेयक पारित गरियोस् भनी प्रस्ताव प्रस्तुत गर्नेछन् । सभाले विधेयक पारित गरेपछि आगामी आव ०८३/०८४ को बजेट पारित हुनेछ । 

यसअघि विनियोजन विधेयक पारित गरेको प्रतिनिधिसभाले आज आर्थिक विधेयक र राष्ट्र ऋण उठाउने विधेयक पारित गरेसँगै बजेट प्रतिनिधिसभाबाट पारित भई राष्ट्रिय सभामा जानेछ । राष्ट्रिय सभाले पारित गरेपछि साउन १ बाट बजेट कार्यान्वयनमा आउनेछ ।