गणेश चीन, कविन्द्र क्यानडा, निशा अमेरिका, विपीन भारत, तोसिमा जर्मनी र मनिषलाई बेलायत हेर्ने जिम्मा

काठमाडौँ । प्रधानमन्त्री एवं राष्ट्रिय स्वतन्त्र पार्टी संसदीय दलका नेता बालेन्द्र शाहले पार्टीका सांसदहरुलाई विभिन्न देश हेर्ने जिम्मेवारीमा सिफारिस गरेका छन् । 

सिफारिसअनुसार सभामुख डोलप्रसाद अर्यालले सम्बन्धित देशको संसदसँग समन्वय गर्नेगरी संसदीय मैत्री समूह गठन गर्ने निर्णय गरेका छन् । ४३ देशका लागि संसदीय मैत्री समूह गठन गरिएको संसद सचिवालयले जनाएको छ । मैत्री समूह गठनका लागि संसद सचिवालयले दलहरुसँग नाम माग गरेकाे थियो । दलका नेता बालेनले सभापति रबि लामिछानेसँग सल्लाह गरी मैत्री समूहका लागि सांसदहरुकाे नाम पठाएका हुन् । 

Watch On

संसद सचिवालयकाअनुसार रास्वपा संसदीय दलका उपनेता गणेश पराजुलीलाई चीनको जिम्मा दिइएको छ । नेपाल-चीन संसदीय मैत्री समूहको संयोजकको जिम्मेवारी पराजुलीले पाएका हुन् । यो समूहको सदस्यमा बसुमाया तामाङ, रञ्जु न्यौपाने, विश्वराज पोखरेल, टेकबहादुर गुरुङ र भरत गिरी छन् । 

यसैगरी रास्वपा मुख्य सचेतक कविन्द्र बुर्लाकोटीले क्यानडाको जिम्मेवारी पाएका छन् । नेपाल क्यानडा संसदीय मैत्री समूहको सदस्यमा बब्लु गुप्ता, स्मृति सेन्चुरी, यज्ञमणि न्यौपाने, नरेन्द्रकुमार केरुङ, रामबहादुर थापा, महेन्द्रबहादुर शाही छन् । 

रास्वपा सहमहामन्त्री निशा डाँगी अमेरिकाको संसदसँग समन्वय गर्ने जिम्मेवारी पाएकी छिन् । नेपाल अमेरिका मैत्री समूहमा हरिप्रसाद भुसाल, सन्तोष राजवंशी, ज्ञानेन्द्रसिंह महता, जीतजंग बस्नेत, रुक्मिणी देवी कोइराला, गोपाल शर्मा, सरस्वती लामा, अम्बिका देवी संग्रौला सदस्य छन् । 

रास्वपा महामन्त्री विपीन आचार्यले छिमेकी भारतको संसदसँग समन्वय गर्ने जिम्मेवारी पाएका छन् । नेपाल भारत मैत्री समूहमा विदुशी राणा, अरविन्द साह, पुनमकुमारी अग्रवाल, चन्द्रमोहन यादव, सन्दिप राना, मोहम्मद इस्तियाक राई, ताहिर अली भाट, आरेन राई र महन्थ ठाकुर सदस्य छन् । 

सांसद डा. तोसिमा कार्कीलाई जर्मनको संसद हेर्ने जिम्मेवारी दिइएको छ । नेपाल जर्मनी संसदीय मैत्री समूहमा नरेन्द्रकुमार गुप्ता, श्रीधर पोखरेल, खम्मबहादुर खाती, टुका भद्रा हमाल, नरबहादुर विष्ट, तुलप्रसाद विश्वकर्मा सदस्य छन् । 

सांसद मनिष झालाई बेलायतको संसद हेर्ने जिम्मा दिइएको छ । बेलायत संसदीय व्यवस्थाको जननी हो । नेपाल युके मैत्री समूहमा सागर भुसाल, कृपा महर्जन, राजुनाथ पाण्डे, भूमिका सुब्बा लिम्बु, पूर्णप्रसाद लिम्बु सदस्य छन् ।

संसद सचिवालयका प्रवक्ता एकराम गिरीकाअनुसार संसदीय मैत्री समूहले विभिन्न देशसँगको कूटनीतिक सम्बन्धमा आपसी सम्वाद र संसदीय अनुभव र अभ्यास आदानप्रदान गर्छ ।

ट्र्याक-टु डिप्लोमेसी (संसद् तहको कूटनीति) अन्तर्गत महत्वपूर्ण भूमिका खेल्छ । दुई देशबीचको औपचारिक तथा अनौपचारिक कूटनीतिक सम्बन्ध थप प्रगाढ बनाउन मदत गर्छ ।

साझा हित, व्यापार, पर्यटन र विविध मुद्दामा सहकार्यका लागि संवाद गर्न भूमिका खेल्छ । नागरिक टु नागरिक सम्बन्धलाई संसदमार्फत थप परिष्कृत बनाउने काम गर्छ ।