समता कर हटाउन प्रधानमन्त्री बालेन र अर्थमन्त्री वाग्लेबीच एक घण्टा भएको थियो छलफल

काठमाडौँ । प्रधानमन्त्री बालेन शाहले आज अपरान्ह सामाजिक सञ्जालमा स्टाटस पोस्ट गर्दै निजी शिक्षा र स्वास्थ्यमा सरकारले लगाएको ३ प्रतिशत समता शुल्क लागु नगर्ने घोषणा गरे । उनले लेखे– ‘माननीय अर्थमन्त्री स्वर्णिम वाग्लेसँगको परामर्शपछि हालका लागि शिक्षा समता शुल्क र स्वास्थ्य समता शुल्क लागू नगर्ने निर्णय गरिएको छ।’

अर्थमन्त्री डा. स्वर्णिम वाग्लेले गत जेठ १५ गते चालु आर्थिक वर्षका लागि संसदमा बजेट पेश गर्दै साउनदेखि निजी शिक्षा र स्वास्थ्यमा तीन प्रतिशत समता कर लगाइने घोषणा गरेपछि केही आलोचना भएको थियो ।

Watch On

साउन लागेसँगै निजी विद्यालय तथा कलेज र अस्पतालहरुले बिलमा ३ प्रतिशत समता कर लगाउन थालेपछि आलोचनाको पारो केही बढेको थियो ।

त्यही क्रममा सोमबार दिउँसो प्रधानमन्त्री बालेन र अर्थमन्त्री डा. वाग्लेबीच प्रधानमन्त्री कार्यालय सिंहदरबारमा करिव १ घण्टा छलफल भयो ।

सिंहदरबार स्रोतका अनुसार, छलफलका क्रममा प्रधानमन्त्री र अर्थमन्त्रीले एउटा उपाय निकाले– तत्कालका लागि समता शुल्क फिर्ता लिने । ‘सोही अनुसार नै प्रधानमन्त्रीले समता शुल्क फिर्ता लिएको घोषणा गर्नु भएको हो’ स्रोतले सिधाकुरासँग भन्यो ।

समता शुल्क कसरी फिर्ता हुन्छ ?

प्रधानमन्त्रीको घोषणाले समता शुल्क निष्कृय भएको छ । अझ भनौं स्थगन भएको छ ।

यसलाई कार्यान्वयन गर्न मन्त्रिपरिषद्को बैठकले निर्णय गर्नुपर्छ ।

सम्भवतः भोलि मन्त्रिपरिषद बैठक बस्ने छ र सोही बैठकबाट समता शुल्क फिर्ता लिने औपचारिक निर्णय हुने छ ।

त्यसपछि सरकारले उक्त निर्णयबारे संसदलाई जानकारी गराउने छ ।

प्रधानमन्त्रीले सामाजिक सञ्जालमार्फत घोषणा गरेलगत्तै निजी(संस्थागत) विद्यालयहरुले समता शुल्कको नाममा तीन प्रतिशत थप शुल्क नलिने बताएका छन् । यदि कुनै विद्यालय तथा कलेजले शुल्क लिइसकेको भए फिर्ता हुने उनीहरुको भनाइ छ ।