बागमतीमा किरण थापामगरलाई विश्वासको मत लिन सकस, समय सारेको सार्‍यै

काठमाडौँ । गठबन्धनमै रहेको दल नेपाली कम्युनिस्ट पार्टी (नेकपा)का केही सांसदहरुको असन्तुष्टिका कारण बागमतीका मुख्यमन्त्री किरण थापामगरलाई प्रदेश सभामा विश्वासको मत लिन सकस देखिएको छ । 

प्रतिपक्षी कांग्रेसको अवरोध गर्ने चेतावनी र नेकपाका केही सांसदको अनुपस्थितिका कारण प्रदेश सभा बैठकको समय सारिएको छ ।

Watch On

विश्वासको मतका लागि सुरुमा दिउँसो १ बजे प्रदेशसभाको बैठक बोलाइएको थियो । बैठक सारेर ५ बजे पुर्याइयो । साँझ ६ बजिसक्दा पनि बैठक सुरु भएको छैन ।

एमाले सांसद केशव पोखरेलले असन्तुष्ट भनिएका नेकपाका केही सांसदहरु बैठकका लागि आउने क्रममा रहेको जानकारी दिए । ‘उहाँहरु अन द वे हुनुहुन्छ’ उनले भने ।

उनका अनुसार, प्रतिपक्षी कांग्रेसले अदालतमा मुद्दा विचाराधीन रहेको भन्दै बैठक सञ्चालन नगर्न सभामुखलाई पत्र बुझाएको छ । आफूहरुको सहमति बिना बैठक सञ्चालन गरिए अवरोध गर्ने चेतावनी पनि कांग्रेसले दिएको छ ।

बागमती प्रदेशका नवनियुक्त मुख्यमन्त्री थापालाई विश्वासको मत प्राप्त गर्न प्रदेशसभाको तत्काल कायम रहेको सदस्य संख्याको बहुमत अर्थात ५३ सांसदको समर्थन आवश्यक पर्छ । तर, सत्ता साझेदार नेकपाका सांसदहरु गंगानारायण श्रेष्ठ, युवराज चौलागाईं, कृष्ण खनाल, लक्ष्मण लम्साल लगायत केही सांसद अहिलेसम्म प्रदेशसभा पुगेका छैनन् ।

खासगरी नेकपाका पूर्व एकीकृत समाजवादी खेमाका सांसदहरु मन्त्रिरिषद् विस्तारलाई लिएर असन्तुष्ट छन् । पार्टी नेतृत्वले राप्रपाभित्र खेलिरहेको विषयमा पनि केही सांसदहरुले आपत्ति जनाएका छन् ।