रास्वपामा नेताहरुको मूल्यांकनको नयाँ मापदण्ड

काठमाडौँ । राष्ट्रिय स्वतन्त्र पार्टीले नेताहरुको कार्यसम्पादन मूल्यांकनमा नयाँ मापदण्ड लागु गरेको छ । 

सभापति रवि लामिछानेकाअनुसार योग्यता, विज्ञता, क्षमता र राजनीतिक प्रतिबद्धताका साथै पार्टीका गतिविधिमा  हुने उपस्थितिलाई पनि नेताहरुको पर्फमेन्सको आधार बनाइएको छ । 

Watch On

केन्द्रीय सदस्यहरुलाई शनिबार र आइतबार गरी दुई दिनसम्म आयोजित प्रशिक्षण कार्यक्रममा सभापति लामिछानेले  पार्टीका गतिविधिमा हुने उपस्थितिलाई पनि नेताहरुको मूल्यांकनको आधार बनाइएको जानकारी गराए । 

यो मापदण्ड लागु नभए राजनीतिक जीवनमा गाह्रो पर्ने भन्दै सभापति लामिछानेले केन्द्रीय सदस्यहरुसहित सिंगो पार्टी पंक्तिलाई सचेत पनि गराएका छन् । 

'तपाईको उपस्थिति, उपस्थित भइसकेपछिको कार्यक्रमप्रतिको सहभागिता, संवेदनशीलता सबै पार्टीले नोट गरिरहेको छ है साथीहरु । भोलि पर्सी खै त, मैले यत्रो काम गर्दा पनि, यति लामो समयदेखि काम गर्दा पनि खै मैले त केही अवसर पाइन भन्ने कुरा आउँदा तपाईको उपस्थितिहरु, तपाईका हाजिरीहरु, तपाईका सहभागिताहरु सबै हिसाब बहिखातामा चढ्लान । त्यसकारणले साथीहरुलाई अनुरोध गर्न चाहन्छु, पार्टीका बैठकहरु, पार्टीले बोलाएको छलफल, त्यसमा सहभागी नहुने, सहभागी भइदिए जस्तो गर्ने कामले भोलि तपाईलाई गाह्रो पर्ला । अफ्ठेरो पर्ला । मैले यति भने । तपाईहरुले अझ बुझ्नुहोला,' उनले भने ।  

सभापति लामिछानेले विधिभन्दा बाहिर गएर पार्टी चल्न नसक्ने पनि स्पष्ट पारे । 'विधिभन्दा बाहिर गएर कुनै पनि संस्था चल्न सक्दैन । राजनीतिक पार्टी त चल्नै सक्दैन । आफू नेतृत्वमा भएका बेला विधि मिचे भने मेरो अस्तित्वमा पनि तपाइले प्रश्न गर्न पाउनुहुन्छ । त्यसकारण आफ्नो अस्तित्वमा प्रश्न हुने काम मेरो कार्यकालमा नहोस् भनेर सचेत छु,' उनले भने । 

सभापति लामिछानेले आगामी स्थानीय तहको निर्वाचनमा क्यान्डिडेट क्लब, लिडरसिप एकेडेमी अक्षरश पालना गरेर उम्मेदवारको चयन हुने पनि स्पष्ट पारे । 'पार्टीले अनुमोदन गरेका दस्तावेजको अक्षरश पालना हुन्छ । पार्टीले बनाएको विधि निर्देशिका नियमावलीको अक्षरश पालना हुन्छ । विधिभन्दा बाहिर जान सक्दैनौं,' उनले भने ।