खुकुलो बनाइयो रास्वपाको उम्मेदवार छनोट विधि, अब अघिल्लो चुनावका आकांक्षीले पनि एप्लाई गर्न पाउने

काठमाडौँ । राष्ट्रिय स्वतन्त्र पार्टीले आगामी स्थानीय तह निर्वाचनका लागि उम्मेदवार छनोटको विधि परिमार्जन गरेको छ । 

केन्द्रीय समितिको ५ भदाैमा बसेको बैठकले महामन्त्री विपीन आचार्यको संयोजकत्वमा तयार गरिएको उम्मेदवार छनोट रूपरेखामा प्राप्त सुझावसमेत समेटेर अनुमोदन गरेको थियो । संशोधित दस्तावेजमा केही खुकुलो प्रावधान राखिएको छ । 

Watch On

यसअघि उम्मेदवार छनोट रुपरेखाअनुसार फागुन २१ मा सम्पन्न प्रतिनिधि सदस्य निर्वाचनमा उम्मेदवार हुन छनोट प्रक्रियामा सहभागी भएकाहरु समेत अहिले स्थानीय तहमा उम्मेदवार बन्न नपाउने कडा व्यवस्था गरिएको थियो । 

तर, केन्द्रीय समिति बैठकले यो नियम परिमार्जन गरेको हो । संगठन विभाग प्रमुख प्रमोद न्यौपानेकाअनुसार अब फागुन २१ को प्रतिनिधि सभा सदस्य निर्वाचनमा उम्मेदवार हुनका लागि छनोट प्रक्रियामा सहभागी भएकाहरुले स्थानीय निर्वाचनमा उम्मेदवार बन्न आवेदन दिन पाउनेछन् । 

फागुन २१ को निर्वाचनअघि विभिन्न समूहसँग पार्टी समायोजन हुँदा त्यतिबेला क्यान्डिडेट क्लब र प्रारम्भिक निर्वाचन लागु नभएकाले केन्द्रीय समितिले त्यतिबेला उम्मेदवारीका लागि आवेदन दिएकाहरुलाई स्थानीय चुनावमा मौका दिने निर्णय गरेको संगठन विभाग प्रमुख न्यौपानेले बताए । 

यद्यपि फागुन २१ को निर्वाचनमा उम्मेदवार नै भएर भाग लिएकाहरुले भने पाउने छैनन् । 

रास्वपाले भदौ १ बाट क्यान्डिडेट क्लबमार्फत उम्मेदवारीका लागि आवेदन खुल्ला गरिसकेको छ । रास्वपाको एपमार्फत आवेदन दिन सकिने व्यवस्था छ । 

यसैगरी उम्मेदवार छनोट गर्दा आकांक्षीको बारेमा वडा तथा पालिका कमिटीबाट राय लिने नयाँ व्यवस्था पनि गरिएको छ । 

यसैगरी उम्मेदवार छनोट समितिको संख्या पनि हेरफेर गरिएको छ । 

केन्द्रीय समितिले स्थानीय निर्वाचनका लागि केन्द्रीय उम्मेदवार छनोट समिति सदस्यका लागि इच्छुक केन्द्रीय समिति सदस्य तथा प्रतिनिधिसभा सदस्यहरूबाट नामावली माग गर्ने निर्णय गरिसकेको छ । 

रास्वपाले स्थानीय तहका उम्मेदवार छनोटसम्बन्धी प्रक्रिया र मापदण्डबारे देशभरका ४६० गाउँपालिकामा अभिमुखीकरण कार्यक्रम सञ्चालन गर्ने तयारी गरेको छ । 

कार्यक्रमको संयोजनको जिम्मेवारी सहमहामन्त्री निशा डाँगीलाई दिइएको छ ।