३ मन्त्री र सभामुख पाएपछि बागमतीमा नेकपा विवाद सुल्झियो

काठमाडौँ । शक्ति बाँडफाँटलाई लिएर बागमती प्रदेशमा नेपाली कम्युनिस्ट पार्टी (नेकपा) भित्र बढेको विवाद सुल्झिएको नेताहरूले बताएका छन् ।

एक नेताका अनुसार, एमाले नेता किरण थापामगर नेतृत्वको प्रदेश मन्त्रिपरिषदमा अब नेकपाले ३ मन्त्री पाउने छ भने प्रदेश सभामा रिक्त सभामुख पनि पाउने छ । मन्त्री बाँडफाँटमा असन्तुष्ट पूर्वएकीकृत समाजवादी पक्षलाई पनि समेटिने छ।

Watch On

नेताहरुका बीचमा शक्ति बाँडफाँटमा सहमति भएपछि अब नेकपाका सबै सांसद थापालाई विश्वासको मत दिन राजी भएका छन् ।

स्रोतका अनुसार नेकपा सांसद रत्न ढकाललाई सभामुख बनाउने चर्चा छ । तत्कालीन सभामुख भुवन पाठकले राजीनामा दिएपछि बागमती प्रदेशमा सभामुख पद रिक्त छ । उपसभामुख अप्सरा चापागाईंले नै कार्यबाहक सभामुखको भूमिका निर्वाह गरिरहेकी छन् ।

अन्य विवाद शीर्ष नेताहरूले सुल्झाउने पनि एक नेताले बताए । नेकपा संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपालका बीचमा छलफल हुने पनि ती नेताले बताए ।

मन्त्रालय बाँडफाँटमा नेकपाभित्र पूर्व एकीकृत समाजवादीलाई उपेक्षा गरिएको भन्दै केही सांसद हिजो प्रदेशसभा बैठकमा सहभागी भएनन् ।  मन्त्री बाँडफाँटमा पूर्वमाओवादी केन्द्रभित्र पनि विवाद थियो । प्रदेशको शक्ति सन्तुलनअनुसार मन्त्रालय बाँडफाँट नभएको भन्दै उनीहरूले असन्तुष्टि जनाएका थिए ।

मुख्यमन्त्री किरण थापा मगरले विश्वासको मत लिने प्रयोजनका लागि आज दिउँसो ४ बजे प्रदेश सभाको बैठक बोलाइएको छ ।

नेकपाभित्रको विवाद सुल्झिए पनि प्रतिपक्षी कांग्रेसले भने मुख्यमन्त्री नियुक्तिसम्बन्धी मुद्दा अदालतमा विचाराधीन रहेको भन्दै अदालतको आदेश नआएसम्म बैठक नबोलाउन सभामुखलाई आग्रहसहितको पत्र हिजो नै बुझाइसकेको छ । जबरजस्ती बैठक बोलाइए अवरोध गर्ने चेतावनी पनि कांग्रेसले दिएको छ ।

उच्च अदालतमा दायर मुद्दामा कारण देखाउ आदेश जारी गरेकोमा भोलि दुवै पक्षलाई बोलाइएको छ ।