ओलीबारे प्रतिवेदनमार्फत के भनेका छन् शंकर पोखरेलले ?

काठमाडौं । नेकपा एमालेका महासचिव शंकर पोखरेलले कार्यदलको प्रतिवेदनमार्फत पार्टी नेतृत्वको खुलेर आलोचना गरेका छन् र सुधारको माग गरेका छन् ।

Watch On

उपाध्यक्ष रामबहादुर थापा बादललाई बुझाइएको प्रतिवेदनमा नेतृत्वको अधिकारको अतिकेन्द्रीकरण र सामूहिक नेतृत्वको ह्रासका कारण एमालेले दुर्गति भोग्नुपरेको उल्लेख गरेका छन् ।

‘८ औं महाधिवेशनदेखि अभ्यास गरिएको बहुपदीय संरचना र सामूहिक नेतृत्व प्रणालीलाई संकुचित गर्दै ११औं महाधिवेशनमार्फत विधानमा अध्यक्षकेन्द्रित अधिकार अत्यधिक वृद्धि गरियो । यसले सामूहिक निर्णय प्रक्रिया र नेतृत्व विकासको आधारलाई कमजोर बनायो,’ उनले भनेका छन् ।

कमिटी प्रणाली भत्किँदा र नेतृत्वकेन्द्रित कार्यशैली हावी हुँदा वैचारिक कामभन्दा अवसरका लागि नेताहरूको वरिपरि घुम्ने, चाकरी र चाप्लुसी गर्ने गणेश प्रवृत्ति मौलाएको उनको ठहर छ ।

यस्तै उनले नेतृत्व तहमा आफ्ना कमजोरीहरूको आलोचना सुन्न नचाहने र आत्मप्रशंसाको भोक बढ्ने प्रवृत्ति देखिएको उनले बताएका छन् । जसले कार्यकर्तामा हो मा हो मिलाउने चाटुकारिता बढाएको बताएका छन् ।

‘कम्युनिस्ट पार्टीमा हुनुपर्ने कमरेडली भावना कमजोर भयो र असहमत पक्षलाई बोलाएर छलफल गर्नुको सट्टा सिधै कित्ताकाट गर्ने प्रवृत्ति नेतृत्वमा देखियो,’ उनले भनेका छन् ।

यति मात्र होइन, भदौ २३ को आन्दोलनमा मारिएका र घाइते भएका युवाहरूप्रति मानवीय संवेदना र सहानुभूति प्रकट गर्न नेतृत्वले कञ्जुस्याइँ गर्दा पार्टी असंवेदनशील र दम्भी भएको भाष्य विपक्षीहरूले स्थापित गर्ने मौका पाएको पनि महासचिव पोखरेलले उल्लेख गरेका छन् ।

यस्तै निर्वाचनमा बेहोर्नुपरेको लज्जास्पद र अकल्पनीय पराजयका लागि मुख्य नेतृत्वले नैतिक जिम्मेवारी लिनुपर्ने आवाज कार्यकर्ता तहबाट बलियो रूपमा उठेको छ भन्दै उनले घुमाउरो भाषामा अध्यक्ष ओलीलाई नेतृत्व छाड्न भनेका छन् ।

विगतमा (२०६४ सालमा) पार्टी पराजित हुँदा तत्कालीन महासचिव माधवकुमार नेपालले नैतिकताको आधारमा राजीनामा दिएको नजिरलाई पनि प्रतिवेदनमा स्मरण गरिएको छ ।

महासचिव पोखरेलले उमेर हद र दुई कार्यकालको सीमा हटाउँदाको असर पार्टीमा परेको बारम्बार उल्लेख गरेका छन् ।

‘पार्टी विधानबाट ७० वर्षे उमेर हद र कार्यकारी पदमा बढीमा दुई कार्यकाल रहने लोकतान्त्रिक व्यवस्था हटाउँदा नयाँ पुस्ता पार्टी र आन्दोलनबाट टाढियो । कार्यकर्ताहरूले यस व्यवस्थालाई विधान संशोधन गरेर तुरुन्त ब्युँताउन माग गरेका छन्,’ उनले भनेका छन् ।

यस्तै वरिष्ठ नेताहरूलाई मार्गदर्शक को रूपमा सम्मानित भूमिका (अभिभावक) मा राखी कार्यकारी तहमा नयाँ पुस्तालाई स्थान दिन अन्तर–पुस्ता आबद्धता को योजना ल्याउन सुझाव दिइएको छ ।

अध्यक्ष केपी शर्मा ओलीको ऐतिहासिक योगदान र सफलताहरूको उच्च मूल्यांकन हुनुपर्ने महासचिव पोखरेलले बताएका छन् ।

अध्यक्ष ओलीको नेतृत्वमा पार्टीले जातीय र क्षेत्रीयतामा आधारित विग्रहकारी एजेन्डाहरूको बलियो प्रतिवाद गर्न सफलता पाएको उनले उल्लेख गरेका छन् ।

दोस्रो संविधानसभाबाट संविधान जारी गर्ने ऐतिहासिक कार्य, नाकाबन्दीको दृढतापूर्वक सामना, र चीनसँगको ऐतिहासिक व्यापार तथा पारवहन सम्झौता गरी नेपाललाई भूपरिवेष्टित बाट भूजडित राष्ट्र बनाउने काम ओलीकै नेतृत्वमा भएको प्रतिवेदनमा उल्लेख छ ।

२०७४ को निर्वाचनमा वाम गठबन्धन बनाई ऐतिहासिक सफलता हासिल गर्नु र जनताको बहुदलीय जनवाद (जबज) को विकास एवं प्रवर्द्धनमा ओलीले महत्त्वपूर्ण भूमिका रहेको कुरा प्रतिवेदनमा उल्लेख छ ।