तीन तहका सरकारबीच समन्वय अभाव हटाऊ: गगन थापा

काठमाडौँ । नेपाली कांगे्रसका सभापति गगनकुमार थापाले तीन तहका सरकारबीच देखिएको समन्वयको खाडल हटाउन सरकारलाई सुझाव दिएका छन् ।

Watch On

आइतबार पार्टी कार्यालय सानेपामा भोटेकोशी बाढीपछि उत्पन्न विपद् व्यवस्थापनमा पार्टीले गरिरहेको काम र अबको योजनाका बारेमा आयोजित बैठकमा सभापति थापाले तीन तहका सरकारबीच समन्वयको अभाव देखिएको बताएका हुन् ।

उनले भने– ‘तीन तहका सरकारबीच समन्वयको खाडल देखिएको छ, संघ, प्रदेश र स्थानीय सरकारका बीचमा स्पष्ट कार्यविभाजन हुनुपर्छ र एउटै टिमको रूपमा अघि बढ्नुपर्छ।’

उनले विपद्को घडीमा सरकारसँग काँधमा काँध मिलाएर सरकारलाई साथ दिन कांग्रेस तयार रहेको स्पष्ट पारे । उनले प्रमुख प्रतिपक्ष दलको नाताले सरकारका कमीकमजोरीलाई भने  औल्याउने बताए । 
सभापति थापाले कुनै पनि भ्रामक वा मिथ्या सूचना फैलाउने काममा नलाग्न पार्टी पंक्तिलाई निर्देशन दिए ।

बैठकले आफ्ना सम्पूर्ण कार्यकर्ता तथा पार्टीका निकायहरूलाई परिचालन गर्ने निर्णय गरेको छ भने उद्धार र शव व्यवस्थापनमा प्राथमिकता दिन सरकारको ध्यानाकर्षण गराउने निर्णय भएको कांग्रेस प्रवक्ता देवराज चालिसेले जानकारी दिए ।

प्रभावित तथा पीडितहरूका लागि खाना, लत्ताकपडा÷बन्दोबस्ती, र स्वास्थ्य उपचारको तत्काल उचित व्यवस्था हुनुपर्ने, विपद् प्रभावित क्षेत्रका बालबालिकाहरूको शिक्षासँग जोडिएका समस्याहरूलाई विशेष ध्यान दिनुपर्ने उनले बताए ।