समाज

प्रधानमन्त्रीले भने– ११,९९३ को उद्धार, ३,९१६ सम्पर्कविहीन

सिधाकुरा

बुधबार, भदौ १७, २०८३

प्रधानमन्त्रीले भने– ११,९९३ को उद्धार, ३,९१६ सम्पर्कविहीन

काठमाडौँ । प्रधानमन्त्री बालेन शाहले बाढी प्रभावित क्षेत्रबाट अहिलेसम्म ११ हजार ९ सय ९३ जनाको उद्धार गरिएको बताएका छन् । प्रतिनिधिसभाको आजको बैठकमा प्रधानमन्त्री बालेनले अझै पनि ३ हजार ९१६ जना सम्पर्कविहीन भएको बताए ।

Watch On

उनले घटना भएलगत्तै प्रभावित क्षेत्रमा उद्धार कार्य तीव्र पारेको अहिलेसम्म पनि खोजी र उद्धार कार्य जारी रहेको जानकारी दिए ।

उद्धार गरेर विभिन्न अस्पतालहरुमा भर्ना गरिएका २९२ जना घाइतेमध्ये १८२ जना डिस्चार्ज भइसकेको र बाँकी घाइतेहरुको उपचार भइरहेको उनले जानकारी दिए ।

त्यसैगरी प्रभावित क्षेत्रमा विशेषज्ञसहितको टोली नागरिकहरुको उपचारका लागि पनि खटाइएको पनि उनले बताए ।

उपचारसँगै प्रभावित क्षेत्रका नागरिकहरुलाई मनोपरामर्श सेवा पनि उपलब्ध गराइरहेको उनले जानकारी दिए । प्रभावित क्षेत्रमा कुनै पनि महामारी फैलिन नदिन विभिन्न अभियान चलाइरहेको र रोगको रोकथामका लागि विभिन्न माध्यमहरुबाट सूचना प्रवाह समेत भइरहेको उनले बताए ।

उनका अनुसार हाल नुवाकोटका १९ वटा अस्थायी आश्रय स्थलहरुमा २,६५३ जना प्रभावित नागरिकहरुले आश्रय तथा राहत प्राप्त गरेका छन् र रसुवाका केही प्रभावित नागरिकहरुलाई पनि नुवाकोटमा आश्रय तथा राहत उपलब्ध गराइएको छ ।

प्रकाशित मिति: बुधबार, भदौ १७, २०८३

प्रतिक्रिया दिनुहोस्