प्रतिनिधिसभाले पारित गरेको विशेष प्रस्तावमा के छ ?

काठमाडौँ । भोटेकोशी बाढीले निम्त्याएको विपद् व्यवस्थापनका बारेमा प्रतिनिधिसभाले विशेष प्रस्ताव पारित गरेको छ ।

Watch On

बुधबार बसेको प्रतिनिधिसभा बैठकमा सभामुख डोलप्रसाद (डीपी) अर्यालले विशेष प्रस्ताव पेश गरेका थिए । उक्त प्रस्तावलाई बैठकले सर्वसम्मतिले पारित गरेको हो ।

विशेष प्रस्ताव प्रस्तुत गर्दै सभामुख अर्यालले रसुवा बाढीको घटनाप्रति गहिरो दुःख व्यक्त गर्दै मृतकहरूप्रति श्रद्धाञ्जली र परिवारजनमा समवेदना प्रकट गरे । उनले प्रभावित नागरिकहरूको मानसिक स्वास्थ्य र मनोसामाजिक अवस्थाप्रति संवेदनशील बन्दै महिला तथा बालबालिकाको सुरक्षा, संरक्षण र आवश्यक सेवामा सहज पहुँच सुनिश्चित गर्न सरकारको ध्यानाकर्षण गराए ।

राष्ट्रिय शोकको घडीमा तीनै तहका सरकार, सबै राजनीतिक दल र संयन्त्र परिचालन गरी बेपत्ताको खोजी, उद्धार, विस्थापितको पुनस्र्थापना र घाइतेहरूको उचित उपचार प्रबन्ध मिलाउन पनि उनले सरकारलाई निर्देशन दिए ।

यस्तो छ प्रतिनिधिसभाले पारित गरेको विशेष प्रस्ताव 
‘प्रतिनिधि सभाको यो बैठक, मिति २०८३ साल भदौ १० गते बुधबार भोटेकोशी–त्रिशूली नदीमा आएको बाढीले रसुवाको टिमुरे, स्याफ्रुबेशी, वेत्रावती, नुवाकोटको त्रिशूली बजार र देवीघाटलगायत धादिङ, चितवन र गोरखा जिल्लाका त्रिशूली नदी तटीय क्षेत्रका धेरै सङ्ख्यामा स्वदेशी तथा विदेशी नागरिकहरू बेपत्ता हुनुका साथै ठुलो सड्ख्यामा मृत्यु भएको र व्यापक जनधनको क्षति भएको घटनाप्रति गहिरो दुःख प्रकट गर्दछ। साथै, उक्त घटनाबाट घरबारविहीन भएकाहरूको व्यवस्थापन एवम् घाइतेहरूको शीघ्र स्वास्थ्य लाभको कामना गर्दै दिवङ्गतहरूको आत्माको चीर शान्तिको कामना गर्दछ र शोक सन्तप्त परिवारजनप्रति हार्दिक समवेदना व्यक्त गर्दछ।’