काठमाडौँ। राष्ट्रपति रामचन्द्र पौडेलको प्रमुख आतिथ्यमा सैनिक मञ्च टुँडिखेलमा शनिबार अपराह्न ‘फूलपाती बढाइँ समारोह–२०८३’ भव्य रूपमा सम्पन्न भएको छ ।

Watch On

नेपाली सेनाका परमाधिपतिसमेत रहेका राष्ट्रपति पौडेलको सम्मानमा नेपाली सेनाले सलामी अर्पण गरेको थियो । समारोहमा नेपाली सेनाका विभिन्न टोलीले शङ्खघोषसहित राइफलबाट लहरे र एकट्ठा तथा तोपबाट बढाइँ प्रदर्शन गरेका थिए ।

समारोहमा सैनिक परेडसमेत प्रदर्शन गरिएको थियो । सैनिक हेलिकप्टरमार्फत ‘फूलपाती बढाइँ समारोह–२०८३’ लेखिएको ब्यानर प्रदर्शन गर्नुका साथै पुष्पवृष्टि गरिएको थियो । सो अवसरमा दुर्गा बन्दनासमेत प्रस्तुत गरिएको थियो ।

नेपाली सेनाले हरेक वर्ष बडादसैँको सप्तमी अर्थात् फूलपातीका दिन सैनिक मञ्च टुँडिखेलमा फूलपाती बढाइँ समारोह आयोजना गर्दै आएको छ । धर्म, संस्कृति र परम्पराको निरन्तरतासँग जोडिएको यो कार्यक्रम नेपालको मौलिक सांस्कृतिक तथा सैनिक परम्पराका रूपमा रहँदै आएको छ ।

परम्पराअनुसार गोरखाबाट ल्याइएको जमरा र फूलपाती साइतअनुसार हनुमानढोकास्थित दसैँघरमा भित्र्याइएपछि टुँडिखेलमा फूलपाती बढाइँ गरिन्छ । दसैँको उल्लाससँग जोडिएको यस समारोहमा नेपाली सेनाले सैनिक अनुशासन, कौशल र परम्परागत बढाइँ प्रदर्शन गर्दै आएको छ ।

समारोहमा प्रथम महिला सविता पौडेल, उपराष्ट्रपति रामसहायप्रसाद यादव, प्रधानमन्त्री वालेन्द्र शाह, प्रधानन्यायाधीश डा. मनोजकुमार शर्मा, सभामुख डोलप्रसाद अर्याल, राष्ट्रियसभा अध्यक्ष नारायणप्रसाद दाहाल, मन्त्रिगणलगायत विशिष्ट व्यक्तित्वको उपस्थिति थियो । त्यस्तै, विभिन्न कूटनीतिक नियोगका प्रमुख तथा प्रतिनिधिहरू पनि समारोहमा सहभागी भएका थिए ।

फूलपाती बढाइँ अवलोकन गर्न सैनिक मञ्च टुँडिखेल वरपर सर्वसाधारणको बाक्लो उपस्थिति थियो । दसैँको प्रमुख सांस्कृतिक उत्सवमध्ये एक मानिने यस समारोहले नेपाली समाजमा प्रचलित धार्मिक आस्था, सांस्कृतिक पहिचान र सैनिक परम्परालाई उजागर गरेको थियो ।

नेपाल टेलिभिजनलगायत विभिन्न सञ्चारमाध्यमले समारोहको प्रत्यक्ष प्रसारण गरेका थिए ।