खिलराजले भने– देशमा अस्थिरता मच्चाउने षड्यन्त्र भइरहेको छ

काठमाडौँ । मन्त्रिपरिषदका पूर्वअध्यक्ष खिलराज रेग्मीले देशमा अस्थिरता मच्चाउने षड्यन्त्र भइरहेको दाबी गरेका छन् । उनले जनताले बनाएको संविधान जनसहमति बिना बदलिन नसक्ने पनि बताएका छन् । 

Watch On

बडा दसैंको अवसरमा शुभकामना सन्देश दिँदै पूर्वअध्यक्ष रेग्मीले देशलाई अस्थिरतातर्फ धकेल्न खोज्ने षड्यन्त्रकारी तत्वहरू सक्रिय हुन खोज्नु दुर्भाग्यपूर्ण रहेको बताएका छन् । 

उनले भनेका छन्– ‘देशलाई कुनै न कुनै रूपले अस्थिरता तिर धकेल्न हौवा पिटाउने, षडयन्त्रकारी तत्त्वहरू बेला बेला टाउको उठाउन खोज्ने प्रवृत्ति देखा पर्नु दुर्भाग्यपूर्ण विषय हो । त्यस्ता तत्त्वहरूलाई निस्तेज हुने गरी पन्छाउनु आजको आवश्यकता हो ।’

सर्वोच्च अदालतका पूर्वप्रधानन्यायाधीश रेग्मीले जनताले बनाएको संविधान जनसहमति बिना बदलिन नसक्ने स्पष्ट पारेका छन् । ‘न्याय सेवामा लामो समय बिताउँदा र दोस्रो संविधानसभाको निर्वाचन सम्पन्न गराउने ऐतिहासिक जिम्मेवारी निर्वाह गर्दा मैले नजिकबाट अनुभव गरेको छु कि जनताको मतबाट निर्मित संविधान र कानुनको शासन नै देशको सबैभन्दा भरपर्दो जग हो । अस्थिरता चाहने तत्त्वले त्यही संविधान माथि नै कर्के नजर लगाउन खोजेको पाइन्छ ।’

रेग्मीले संविधानमा सुधारको आवश्यकता देखिए त्यो पनि संविधानकै बाटो, संवैधानिक प्रक्रिया र व्यापक राष्ट्रिय सहमतिबाटै हुने पनि स्पष्ट पारेका छन् । 

‘असहमति लोकतन्त्रको स्वाभाविक पक्ष हो, तर त्यसको समाधान संवाद, संयम र विधिभित्र खोजिनुपर्छ, हिंसा र अराजकतामा होइन । त्यसैले अस्थिरता निम्त्याउन खोज्ने तत्त्वविरुद्ध देशभक्त एवं राष्ट्रप्रेमी नेपालीहरू प्रतिबद्ध तथा एकताबद्ध हुनु समयको माग हो’ रेग्मीले भनेका छन् ।