नितान्त पारिवारिक भ्रमण हो, खिचडी नपकाउन अनुरोध छः रवि लामिछाने

काठमाडौँ । धार्मीक भ्रमणका लागि भारत प्रस्थान गरेका रास्वपा सभापति रवि लामिछानेले आफ्नो भ्रमणबारे खिचडी नपकाउन आग्रह गरेका छन् । शुक्रबार बिहान काठमाडौंबाट हवाईमार्ग हुँदै धनगढी पुगेका लामिछानेले आफ्नो भ्रमण नितानत पारिवारिक भएको बताएका हुन् । 

Watch On

उनले भने, ‘पहिलेदेखि नै जाने एउटा भाकल पनि थियो । धार्मिक एउटा आस्था, विश्वास, पारिवारिक एउटा संस्कार पनि, मेरो परिवार पनि अध्यात्मिक पनि भएको हुनाले, यो सबै कारणले गर्दा पहिलादेखि नै जाऔंला भन्ने नै थियो । म कारागारमा हुँदा नै एउटा हुन्छ नि परम्परा, भाकल गरिन्छ भनौं न । त्यसलाई पूरा गरौं भनेर जान लागेको हुँ । 

धनगढी विमानस्थलबाट सभापति लामिछाने कञ्चनपुर हुँदै सडकमार्गबाट गड्डाचौकी नाका पुगेका थिए । त्यहाँबाट भारत प्रस्थान गरेका थिए । सो क्रममा उनले आफ्नो भ्रमणबारे कुनै राजनीतिक  खिचडी नपकाउन अनुरोध गरे । ‘कुनै राजनीतिक भेटघाट छैन । कसैलाई खिचडी नपकाउन पनि अनुरोध गर्न चाहन्छु ।’ 

लामिछाने श्रीमती निकिता पौडेल सहित पारिवारिक तीर्थाटनका लागि धनगढी हुँदै भारत प्रस्थान गरेका हुन् । ३ दिनको भ्रमणका क्रममा भारतको उत्तराखण्ड, नैनीताल स्थित कैंची धाम र आसामको गुवाहाटीस्थित कामाख्या मन्दिरमा सपरिवार पूजाअर्चना गर्ने कार्यक्रम तय भएको लामिछानेको निजि सचिवालयले जनाएको छ ।

निजी तथा पारिवारिक तीर्थाटनका क्रममा हुन लागेको यस भ्रमणबारे पार्टी पङ्क्ति, शुभचिन्तक, आम जनसमुदाय तथा सम्बन्धित सबैमा जानकारी गराइएको सचिवालयले जनाएको छ।