त्रिशुलीमा अलप भयो जगदिशको घरको मियो

वीरगञ्ज । जापानको सैनिक अस्पतालमा काम गर्न अन्तर्वार्ताका लागि भन्दै सृष्टि यादवलाई काठमाडौँबाट फोन आयो । 

Watch On

जीवनको उज्जवल सपना बोकेर परिवारको जीवनस्तर उकास्ने सपनासहित जापान जाने अन्तर्वार्ताका लागि सृष्टि जितपुरबाट २७ गते साँझ काठमाडौँका लागि बस चढिन् । 

असार २८ गते बिहान ३ बजे उक्त बस चितवनको सिमलतालमा पहिरोमा पर्यो । त्रिशुलीको भेलमा बससँगै बेपत्ता भइन् सृष्टि । 

घरकी जेठी छोरी उनी पढाईमा कहिल्यै फेल हुनु परेन । एसईई पछि उनले रेडियोग्राफीको पढाई सकिन । सखुवा प्रसौनी गाउँपालिकाको परीक्षामा पहिलो प्रयास मै छनोट भइन् र ५ नम्बर वडाको महुवन स्वास्थ्य चौकीमा काम गर्न थालिन् । 

बुवा जगदिश सामान्य कृषि कर्म गर्छन । बाबु छोरीको आम्दानीले घरमा भाइबहिनीको पढाई र घर खर्च चल्दै आएको थियो । 

मेहनत गरेर पढ्ने र सरकारी जागिरमा नाम निकालेर परिवारलाई अगाडि बढाउने सोच राखेकी उनी परिवारको मियो थिइन् । परिवारको आर्थिक हैसियत थप बलियो बनाउन कामका लागि जापान जाने उनको तयारी थियो । पैसा कमाएपछि अधुरो रहेको घर बनाउने र भाइ बहिनीलाई पढाउने काम पुरा गर्ने सपना उनको थियो । 

'छोरी घरपरिवारको सक्षम व्यक्ति थिइन् । कसैलाई सहयोग गर्न पछाडि नपर्ने सृष्टि जहिल्यै हौसला दिने गर्थिन्', आमा सम्झिन्छन् । 

जहिल्यै पनि आफूहरू गरिब परिवारको भएकाले पढेर केही गर्नुपर्ने दिदीले बताउने गरेको भाइ अनुराग बताउँछन् । जहिल्यै सबैको ख्याल राख्ने दिदी नहुदाँ आफू केही सोच्न नसक्ने अवस्थामा पुगेको उनले बताए । 

बहिनी अर्चना यादव दिदीको सम्झनाले विछिप्त छिन् । आफ्नो प्रिय दिदी गुमाए पनि उनले देखाएको सपना आफूले पुरा गर्ने अठोट उनको छ ।  

पहिरोमा परेर ६५ जना यात्रुसहित २ वटा बस हराएको बुधबार १२ दिन बितिसकेको छ । नेपालका सुरक्षाकर्मीसहित भारतको ‘राष्ट्रिय आपदा मोचन बल–नेशनल डिजास्टर रेस्पोन्स फोर्स’ बाट १२ जनाको प्राविधिक टोलीद्वारा संयुक्त खोजतलास भइरहेको छ ।

प्रमुख जिल्ला अधिकारी इन्द्रदेव यादवका अनुसार सो क्षेत्रमा राडरले शङ्कास्पद वस्तु देखाएपछि बुधबार बिहानबाट पुनः खोजतलास थालिएको छ ।

दुर्घटनापश्चात नदीमा सो दुर्घटनामा परेका  २४ जनाको शव बरामद भएको प्रजिअ यादवले जानकारी दिए ।