शिक्षा क्षेत्रमा व्याप्त दलीयकरणबारे नागरिक संवाद गर्न सुमना श्रेष्ठको वीरगञ्ज–काठमाडौँ यात्रा

Watch On

काठमाडौँ । प्रतिनिधिसभा सदस्य सुमना श्रेष्ठले वीरगञ्जदेखि काठमाडौँसम्म नागरिक संवाद यात्रा सुरु गरेकी छिन् । नागरिकका आवाज सदनसम्म पुर्‍याउन र नागरिकका कुरा सुनेर सिक्न शुक्रबार बिहान ९ बजे वीरगञ्जको घण्टाघरबाट उनले यात्रा सुरु गरेकी हुन्।

‘राजनीतिक पार्टीहरूको दलीय हस्तक्षेपले हाम्रो शिक्षा र प्रशासनलाई तहसनहस बनाएको छ। शिक्षाक्षेत्र बिग्रिनुमा मात्र हैन मिटर ब्याज पीडित, सहकारी बचतकर्ताको समस्या बढ्नु र भ्रष्टाचार नियन्त्रण नहुनु पनि दलीयकरणको परिणाम हो’, श्रेष्ठले भनिन्।  

दलीयकरणको असर देखिएको शिक्षाक्षेत्र त एउटा प्रतिनिधिमूलक क्षेत्र मात्र भएको तर सबै क्षेत्रमा दलीयकरणले सुशासनमा अवरोध भएको श्रेष्ठको बुझाइ छ। ‘राजनीतिक दलका निहित स्वार्थमा कहिलेसम्म हाम्रो बालबालिकाले आफ्नो अधिकार त्याग्नुपर्ने हो ? कहिलेसम्म शिक्षा क्षेत्रलाई दलगत राजनीतिले ब्यारेक बनाएर राख्ने हो ? भ्रष्टाचारको अखडा बनेको शिक्षा क्षेत्रलाई दलीय हस्तक्षेप मुक्त कहिले बनाउने हो ? होइन, कति पुस्ताले गुमाउनु पर्ने हो ? के यो देश कहिले पनि नबनाउने हो ?’ उनले प्रश्न गरिन् ।

‘नेपालमा नेपाली मात्र भएर किन पुग्दैन ? एउटा सामान्य काम गर्न पनि कुनै न कुनै दलको झण्डा मुनि नै बस्न पर्ने किन ? किन जहिले पनि एउटा चिनेको मान्छे नभई केही काम नबन्ने ?’ भन्ने प्रश्न आफ्नो मनमा आएको र यीनै विषयमा नागरिकको भोगाइको गहिराई बुझ्न यात्रा सुरु गरेको श्रेष्ठको भनाई छ। यात्रा वीरगञ्ज, सिमरा, हेटौडा, चितवन, धादिङ हुँदै संसद अधिवेशन सुरु हुनु अघि काठमाडौं पुगेर टुङ्गिनेछ।