पाथीभरा क्षेत्रमा ‘नो केबलकार’ समूहको आज पनि प्रर्दशन, गृहमन्त्रीको राजीनामा माग

  ताप्लेजुङ । ताप्लेजुङको पाथीभरा मन्दिरमा केबलकार बनाउन नहुने भन्दै आन्दोलित समूहले गृहमन्त्री रमेश लेखकको राजिनामा माग गरेको छ । 

Watch On

केबलकार बनाउने नहुने भन्दै पाथीभरा मन्दिरको पैदलयात्रा गरिरहेको सो समूह आज बलुडाँडाबाट नारा जुलुस लगाउँदै फुङलिङ झरिरहेको छ । 

सो क्रममा उनीहरूले गृहमन्त्री रमेश लेखकको राजिनामा माग गरेका हुन् । लिम्बूहरूको धार्मिक आस्थाको धरोहर मुकुलुङ (पाथीभरा) मा केबलकार बनाउन नहुने स्थानीयको मागलाई बेवास्ता गर्दै बल प्रयोग गरेको भन्दै उनीहरु सरकार विरुद्ध आक्रोशित भएका हुन् ।  प्रदर्शनकारीहरूले ‘गृहमन्त्री रमेश लेखक राजिनामा देऊ, केबलकार निर्माण तत्काल बन्द गर’ जस्ता नारा लगाएका थिए ।

प्रधानमन्त्रीको इसारामा गृहमन्त्रीले स्थानीयहरु माथि बल प्रयोग गरेकाले उनको राजिनामा मागिएको प्रर्दशनकारीका एक नेता डिकेन्द्र सिंह लिम्बुले सिधाकुरालाई बताए । 

आफूहरूको धार्मिक धरोहर व्यापारीलाई सुम्पिन खोजेको काण आन्दोलन गर्नु परेको लिम्बु बताउँछन् । झण्डै एक महिना देखि निरन्तर केबलकार परियोजना विरुद्ध आन्दोलित रहेको पनि लिम्बुले बताए ।  

उनीहरूले गत साता देखि पैदल यात्रा गर्दै मुकुलुङ पुगेर क्षमा पुजा गरेका थिए । फर्किएर आउने क्रममा पछिल्लो तीन दिन देखि पाथीभरा क्षेत्रमा प्रहरी र उनीहरबीच झडप समेत भइरहेको छ । केबलकार खारेजी सङ्घर्ष समितिका संयोजक खगेन्द्र लिम्बुको नेतृत्वमा करिब ६ सयका हाराहारीमा रहेका उनीहरु अहिले फुङलिङ पुग्दैछन् ।