क्योउदाईन्यूजका प्रधानसम्पादक दीपक गौतमलाई धम्की दिनेलाई कारबाही गर्न पत्रकार महासंघको माग

काठमाडौँ । जापानबाट सञ्चालित नेपाली अनलाइन न्यूज ‘क्योउदाईन्यूज’का प्रधानसम्पादक दीपक गौतमलाई धम्की दिनेलाई कानुनी कारबाही गर्न पत्रकार महासंघले माग गरेको छ । समाचारको विषयलाई लिएर प्रधानसम्पादक गौतमलाई धम्की दिने केबीएल इन्टरनेसनल कम्पनीका अध्यक्ष कुमार कार्कीलाई कारबाही गर्न महासंघले माग गरेको हो । 

Watch On

महासंघका अनुसार सो अनलाइनले केबीएल इन्टरनेसनल कम्पनीको बदमासीबारे समाचार प्रकाशित गरेको थियो । महासंघका अनुसार उक्त कम्पनीले नक्कली सिओइ बनाइ नेपालबाट जापान मान्छे पठाउने गरेको विषयमा क्योउदाईन्यूजमा समाचार प्रकाशित भएको थियो । सोही निहुँमा फागुन १२ गते कम्पनीका अध्यक्ष कार्कीले महासंघ जापान शाखाका सल्लाहकारसमेत रहेका गौतमलाई सामाजिक सञ्जालमार्फत गालीगलौज र भौतिक कारबाहीको धम्की दिँदै भ्वाइस मेजेस पठाएका हुन् । 

कुनै पनि सञ्चारमाध्यममा प्रकाशित समाचारमा कुनै गुनासो रहे त्यसउपर कानुनी उपचारमा जाने प्रावधान रहँदा रहँदै सो अभ्यासविपरीत पत्रकारलाई धम्क्याउने कदमलाई महासंघले खेद प्रकट गरेको छ । त्यस्तै सो कदमले प्रेस स्वतन्त्रतामाथि गम्भीर प्रहार गरेको र प्रेस स्वतन्त्रताविरोधी उक्त हर्कतको महासंघले कडा भर्त्सना गरेको छ । 

त्यस्तै पत्रकार महासंघ नेपालले धम्की दिनेमाथि कानुनी कारबाहीको प्रक्रिया अगाडि बढाइ संविधानप्रदत्त प्रेसको अधिकारको पूर्ण र सुरक्षित उपभोगको वातावरण निर्माणका लागि सम्बन्धित निकायसँग माग गरेको छ ।